"Azərbaycanlıların İŞİD-ə dəstək göstərməsi əslində qəribə hadisə kimi qəbul olunmamalıdır".
Bunu Sherg.az-a kriminalist İlqar Altay deyib.
Onun sözlərinə görə, İŞİD elə böyük təbliğat qüvvəsinə malikdir ki, indiyə kimi analitiklər, araşdırmaçılar onların təbliğatları barədə məsələləri ayırd edə bilməyiblər:
"Onların gücü çatır ki, avropalı, ingiltərəli, alman və başqa millətlərin nümayəndələrini də buna cəlb edə bilsinlər. Nəinki yardım mənasında, hətta fiziki baxımdan da həmin vətəndaşların cəlb olunmasından söhbət gedir. Məsələn, Almaniyadan olan alman qız İŞİD-ə qoşulur. İnsanlar həm özləri gedir, həm yardım edirlər. Həmin təbliğata təkan verən səbəblər araşdırılmalıdır. Bu isə çox qlobal səbəblərdir. Həlli isə zaman tələb edir. Azərbaycanlıların terror qruplaşmaları ilə əlaqəsi məsələsinə gəldikdə bununla əlaqədar dövlət və ictimai təhlükəsizlik orqanları da tədbirlər görür. Amma fakt faktlığında qalır ki, İŞİD-ə qoşulmalar davam edir".
İnsanların geniş şəkildə cəlb olunmasının təriqətlərdən başladığını deyən İ. Altay İŞİD-in təbliğatının adi dini təbliğat kimi aparıldığını söyləyib:
"Amma sonradan bu mahiyyətini dəyişməyə başlayır. İnsanlar kiminsə övladının dini ibadətlərə başladığını görür, güman etmirlər ki, bunun arxasında nə isə ola bilər. Amma bu məsələnin sonrasını nəzarətdə saxlamaq mümkün olmur. Həmin insanların hara getməsi, hansı cəmiyyətdə birləşmələri, nəyə qoşulmaları bilinmir. Düzdür, bu faktlara Azərbaycanda ciddi şəkildə rast gəlinir, İŞİD-ə qoşulanlar artır. Burada əsas məsələ onların mütləq bazalarının olmağıdır. Müəyyən işlər görülür bu istiqamətdə. Yaxında da terrorçuların, yəni dini ekspremizmlə əlaqəli insanların zərərsizləşdirilməsi baş verdi. Bunlar üzə çıxarıldıqca aydın olur ki, ölkənin daxilində əli silahlı terrorçular var imiş. Yenə qeyd edirəm, Azərbaycanda məsələ həmin ardıcıllıqla gedir. Əvvəl hər şey insanların dinə cəlb olunması ilə başlayır, sonradan bu dini radikallığa keçir, dini ekstremizmə çevrilir və nəticədə dini əsaslarda olan terrorizm yaranır. Terrorizmin kökü isə İŞİD kimi böyük terrorçu təşkilatların xaricdə geniş fəaliyyətinə gedib çıxır. Bildiyimiz kimi onlar özlərini dövlət kimi aparırlar və insanların şüuruna geniş formada təsir edirlər".
Qeyd edək ki, Moskva Hərbi Məhkəməsi azərbaycanlı Nurlan Hacıyev barəsində hökm çıxarıb.
Məlumata görə, Hacıyev terrorçuluğu maliyyələşdirməkdə ittiham olunur. Məhkəmə sübut edib ki, Hacıyev "VKontakte” saytında İŞİD üzvləri ilə əlaqəyə girərək onlara maliyyə yardımı edirmiş. Məhkəmənin qərarıyla Nurlan Hacıyev 5 il müddətinə azadlıqdan məhrum edilib.
Ayyət Əhməd
