"Bir neçə il əvvəl anomal istilərlə əlaqədar açıq havada işlərin dayandırılması xəbərdarlığı ediləndə məlum oldu ki, heç də bütün müəssisələr bu qadağalara əməl etmirlər”.
Bunu "Sherg.az”a Əmək və Əhalinin Sosial Müdafiəsi Nazirliyi (ƏƏSMN) yanında Dövlət Əmək Müfəttişliyi Xidmətinin işəgötürənlərə müraciət etməsindən danışarkən "Konstitusiya” Araşdırmalar Fondunun vitse-prezidenti Zaur İbrahimli söyləyib. Onun sözlərinə görə, aidiyyəti qurumlar xəbərdarlıq etməklə yanaşı bu sahədə effektiv monitorinq təşkil etməlidirlər:
"Yaxşı olar ki, bununla bağlı "qaynar xətt” yaradılsın və pozuntu halları baş verərsə, ora müraciət olunsun. Müvafiq standartlara əməl etməyən müəssisələr haqqında ölçü götürülməli, müxtəlif cərimələr tətbiq olunmalıdır. Təbliğat vasitəsi olaraq, dövlət televiziyasında və digər telekanallarda əhalinin maarifləndirilməsi işi aparılmalıdır.
Sahibkarların qəsdən sıxışdırılması fikri ilə deyil, insanların hüquqlarının pozulması halları ilə bağlı monitorinqlər təşkil edilməlidir. Bu, işəgötürənlərin daha məsuliyyətli olması üçün vacibdir. Bütün bu proseduralar həyata keçirilməsə, vətəndaşların anomal istilər şəraitində çalışmalara cəlb edilib-edilməməsi sahibkarların insafına qalacaq. Amma bu zaman da problemlər yarandığını dəfələrlə müşahidə etmişik”.
Qeyd edək ki, ƏƏSMN-nin açıqlamasına görə, havanın temperaturunun +41 dərəcə selsidən çox olduğu hallarda işçilərin həyat və sağlamlığının qorunması üçün əmək qanunvericiliyinə əsasən zəruri tədbirlərin görülməsi təmin edilməlidir. Əmək Məcəlləsinin 233-cü maddəsinə uyğun olaraq, havanın temperaturu + 41 dərəcə selsidən çox olduğu hallarda açıq havada və sərinləşdirici qurğular olmayan örtülü binalarda, otaqlarda və digər iş yerlərində bütün növ işlərin görülməsi dayandırılmalıdır. Qeyd olunan hallarda işçilərə sərinləmək üçün imkan yaradılmalı, onlara fasilələr verilməli, fasilənin sayı və müddəti işəgötürənlə həmkarlar təşkilatının birgə qərarı əsasında müəyyən olunmalıdır.
Aysel Aslan
