"Azərbaycan Silahlı Qüvvələrinin 100 illik yubileyi münasibətilə hərbi paradın keçirilməsi çox əlamətdar hadisə kimi tarixdə qaldı”.
Bunu "Sherg.az”a ötən gün keçirilən hərbi parad haqqında təəssüratlarını paylaşarkən millət vəkili Adil Əliyev deyib.
O qeyd edib ki, möhtəşəm hərbi parad insanların vətənpərvərlik ruhunu yüksəltdi, bayram əhval-ruhiyyəsi yaratdı:
"Bütün Azərbaycan xalqının ordumuzun gücünə olan inamı bir qədər də artdı. Dünyanın gözü önündə Azərbaycan Silahlı Qüvvələrinin texniki bazasının hansı səviyyədə olduğu bir daha nümayiş olundu. Bu inkişaf ölkə başçısı, Ali Baş Komandan İlham Əliyevin orduya və dövlətə diqqət və qayğısını bir daha göz önünə sərdi. Prezidentin də qeyd etdiyi kimi, hərbi paradda nümayiş olunan silahlar, hərbi texnika ordumuzun malik olduğu vasitələrin hələ bir qismidir. Bizim elə silahlarımız var ki, onları nümayiş etdirmirik. Çünki bu güclü silahları Qarabağda bütün dünyaya göstərəcək, düşmən üzərində sınaqdan keçirəcəyik.
100 illiklə bağlı hərbi paradın keçirilməsi bütün vətəndaşlarımız tərəfindən ruh yüksəkliyi ilə qarşılandı. Paradda nümayiş olunan silahların müzakirəsi hələ də davam edir və hesab edirəm ki, uzun müddət gündəmdə qalacaq”.
Qeyd edək ki, paradda çıxış edən, Ali Baş Komandan, Prezident İlham Əliyev Azərbaycan ordusunun gücündən, yüksək hərbi hazırlığından danışıb. Prezident vurğulayıb ki, Azərbaycan Silahlı qüvvələri düşmənin bütün strateji hədəflərini məhv etməyə qadirdir: "Bu parad Azərbaycan Ordusunun gücünü düşmənə və bütün dünyaya nümayiş etdirəcəkdir. Azərbaycan xalqı əmin ola bilər ki, ordumuz istənilən vəzifəni icra etməyə hazırdır.
Aysel Aslan
