Yevlaxda bir ailənin iki azyaşlı uşağı dərmandan zəhərlənib. Uşaqlar halsız vəziyyətdə xəstəxanaya çatdırılıb. İlkin müayinələr zamanı onların dərmandan zəhərləndiyi məlum olub.Yaxınlarının bildirdiyinə görə, uşaqlar ehtiyatsızlıqdan evdə olan "Valerian” preparatını içiblər.
Dərmandan zəhərlənmələrlə bağlı dəfələrlə mətbuatda yazılsa da belə halların ardı-arası kəsilmək bilmir. Bəzi zəhərlənmələr ehtiyatsızlıqdan, bəziləri isə canına qıymaq istəyənlərin qəsdlə dərman qəbulu zamanı baş verir. Bəs, dərman preparatlarının keyfiyyətsiz olmasını zəhərlənməyə səbəb olan amil kimi qeyd edə bilərikmi?
Sualımızı cavablandıran həkim-allerqoloq Şahvələd Məmmədov "Sherg.az"a bildirdi ki, ümumiyyətlə, yay aylarında zəhərlənmə halları tez-tez baş verir.
Həkim sözlərinə görə, dərman zəhərlənmələr iki xarakterli olur:
"Biri özünə qəsd etmə məqsədi ilə olan zəhərlənmələrdir. Xəstə müəyyən miqdarda tabletkaları qəbul edir və əks təsir olaraq zəhərlənmə qeydə alınır. Bazarda kifayət qədər dərmanlar var. Bu dərmanların hamısı Səhiyyə Nazirliyinin analizator şöbəsində analizlərdən keçir və satışa buraxılır. Dərman allergiyası və zəhərlənməsi ayrı-ayrı anlayışlardır. Məsələn, hansısa dərman keyfiyyətsizdir və yaxud qablaşdırması standarta uyğun deyilsə, müəyyən problemlər yaranır. Əslində Azərbaycanda belə bir hal yoxdur. Dərmanların hamısı nazirlik tərəfindən sertifikalaşdırılır və analiz olunur, daha sonra isə bazara buraxılır.
Ona görə də hazırda zəhərlənmələr keyfiyyətsiz dərmanların dövriyyədə olduğunu göstərmir. Ən çox zəhərlənmələr suitik məqsədli zəhərlənmələrdir. 21 əsrin bəlası olan stress və sosial iqtisadi problemlərlə bağlı insanlar gərginlik keçirirlər. Həmin insanlar ovucla dərmanları atırlar və özlərinə qəsd edirlər. Bu zaman da zəhərlənməyə məruz qalırlar. Amma kütləvi halda dərman zəhərlənməsi yoxdur”.
Yeganə Bayramova
