“Atılan daşlardan biri azyaşlını məktəbə aparan gənc xanıma dəyib”
Dünən Siyəzən rayonunda qiymətlərin süni bahalaşmasına görə, bir qrup vətəndaş etiraz aksiyası keçirib. Rayon icra hakimiyyətinin binası qarşısına yığışan aksiyaçılar işbazların süni qiymət artımına etiraz ediblər.
Hadisə yerinə Çevik Polis Alayının əməkdaşları cəlb olunub. Nəticədə hüquq-mühafizə orqanları ilə etirazçılar arasında qarşıdurma yaşanıb. Bəzi media qurumlarında və sosial şəbəkələrdə yayılan məlumatlara görə, qarşıdurmada vətəndaşlara qarşı bibər qazından istifadə edilib və iğtişaş zamanı azyaşlı uşaq xəsarət alıb. Yayılan informasiyalarla bağlı "Şərq”ə açıqlama verən Daxili işlər nazirinin Mətbuat Xidmətinin rəis müavini Ehsan Zahidov deyib ki, Siyəzəndə razılaşdırılmamış aksiya keçirməyə cəhd göstərən bir qrup sakin öz aqressiv davranışları ilə ətrafdakı dinc insanların həyatı üçün təhlükə yaradıb: "İctimai asayişi təmin edən polis əməkdaşları onların bu qanunsuz hərəkətlərinin qarşısını alarkən həmin şəxslər polisə müqavimət göstərərək onlara daş və digər əşyalar atıblar. Atılan daşlardan biri azyaşlını məktəbə aparan gənc xanıma dəyib və o, ciddi xəsarət alaraq yerə yıxılıb. Dərhal iki polis əməkdaşı öz həyatlarını riskə qoyaraq, yaralı xanımı hadisə yerinə gələn təcili tibbi yardım maşını ilə xəstəxanaya çatdırıblar”.
İsmayıl
