"Dolların "qara bazar”ının formalaşdırılması, qanunsuz sahibkarlıq fəaliyyəti ilə məşğulluq kimi dəyərləndirilə bilər”.
Bu sözləri "Şərq”ə "Konstitusiya” Araşdırmalar Fondunun prezidenti Əliməmməd Nuriyev deyib. Ekspertin qənaətincə, valyutadəyişmə fəaliyyəti ilə məşğul olunursa, bu, bank fəaliyyətinin bir növüdür: "Bank fəaliyyəti ilə məşğul olursansa, lisenziya almalısan. Lisenziya almadan sahibkarlıq fəaliyyətilə məşğul olmaq doğru deyil. Həmin şəxslər gəlir əldə edirlər. Ona görə də, onlara qarşı, qanunsuz sahibkarlığa görə, cinayət işi qaldırıla bilər. Hüquq-mühafizə orqanları onları bu cür tövsif edə bilər”.
Müsahibimiz diqqətə çatdırıb ki, bu məsələyə dair İnzibati Xətalar Məcəlləsinin 222.1 ci maddəsi var və orada valyutanın tənzimlənməsi qaydalarının pozulmasından söhbət gedir: "Burada valyuta sərvətlərinin satılması və dəyişdirilməsi ilə bağlı predmetin 30 faizindən 70 faizinə qədər cərimə edilməsindən söhbət gedir. Tutaq ki, həmin işbazların əlində 1000 dollar valyuta tutularsa, 30 faizindən 70 faizinə qədər cərimə tətbiq edilə bilər. Bu, cinayət məsuliyyəti deyil, inzibati xətadır. Cinayət məsuliyyəti odur ki, qanunsuz sahibkarlıqla məşğuldurlar. Qanunda valyuta sərvətlərinin alqı-satqısı ilə bağlı inzibati xəta nəzərdə tutulub. Amma eyni zamanda qanunverici orqan cinayət məcəlləsində qanunsuz sahibkarlıq barədə həmin fəaliyyəti də tənzimləyə bilər. Çünki gəlir əldə etmə faktı var. Belə olan halda həmin şəxsi qanunsuz sahibkarlıq fəaliyyətinə görə məsuliyyətə cəlb etmək mümkündür. Çünki lisenziya olmadan, gəlir əldə edilir”.
Ayyət Əhməd
