Prezident Yanında Əfv Məsələləri Komissiyası 21 üzvdən ibarətdir. Onlardan ikisi - Yeni Azərbaycan Partiyası İdarə Heyətinin üzvü Zahid Qaralov, Xalq şairi Vaqif Səmədoğlu ötən il, Xalq şairi, Azərbaycan Aşıqlar Birliyinin sədri Zəlimxan Yaqub isə bir neçə gün bundan əvvəl vəfat edib.
Maraqlıdır, hüquq müdafiəçiləri necə düşünür, hər zaman cəmiyyətin maraqla izlədiyi komissiyanın tərkibinə yenidən baxılmağa ehtiyac varmı? Qeyd edək ki, dövlət rəsmiləri, Milli Məclisin deputatları və ictimaiyyət nümayəndələrindən təşkil olunan komissiyanın iclasları 11 üzv iştirak etdikdə, baş tutmuş sayılır.
Millət vəkili, hüquq müdafiəçisi Çingiz Qənizadənin sözlərinə görə, komissiyanın tərkibinə yenidən baxılması məsələsi gözləniləndir. Ç.Qənizadə hesab edir ki, kimlərsə fiziki problemləri ilə bağlı komissiyanın işində iştirak edə bilmirsə, ya onlar könüllü komissiyadan getməlidir, ya da onların əvəzinə daha işlək, daha operativ çalışmaq bacarığı olan insanlar üzvlüyə salınmalıdır: "Prezident ildə bir neçə dəfə əfv sərəncamı imzalayır, humanist addım atır. Bu baxımdan Əfv Komissiyasında işlək insanların olması daha önəmlidir”. Komissiyada təmsil olunan insanların əlçatan olması məsələsinə toxunan millət vəkili Prezidentin hər zaman ictimai nəzarətə önəm verdiyini vurğulayıb: "Əfv Məsələləri Komissiyasında ictimaiyyət nümayəndələrinin olması çox önəmlidir. Doğrudur, komissiyada bir neçə şəxs var ki, onlar əlçatandırlar. Amma məsələyə baxılarkən həm mətbuat işçilərinin, həm də hüquq müdafiəçilərindən kimlərinsə komissiyada təmsil olunması daha yaxşı olardı. Ən azından informasiya əldə etmək baxımından bu faktorlar nəzərə alınmalıdır”. İnsan Hüquqları üzrə Birgə İşçi Qrupun üzvü, hüquq müdafiəçisi Sahib Məmmədov isə Əvf Məsələləri Komissiyasının tərkibi "Əfv haqqında Əsasnamə”sinə uyğun tənzimlənir. Onun sözlərinə görə, kiminsə komissiyaya daxil edilməsi, tərkibdən kənarlaşdırılması məsələsi prezidentin birbaşa səlahiyyətinə aid olan bir məsələdir: "Dövlət başçısı məqsədəuyğun bildiyi vaxtda Komissiyanın tərkibini dəyişə, yaxud da vəfat etmiş şəxsləri uyğun şəxslərlə əvəzləyə də bilər”.
S.Məmmədovun sözlərinə görə, Komissiyanın indiki say tərkibi qərarları qəbul etmək, tövsiyələr hazırlamaq üçün yetərli olduğu üçün yenilənməyə ehtiyac görülmür: "Komissiyanın tərkibində daimi vəzifəsinə görə təmsil olunanlar da var. Hüquq-mühafizə orqanlarının rəhbərlərinin hər biri Əfv Komissiyasının üzvüdür. Daxili İşlər, Milli Təhlükəsizlik, Ədliyyə nazirləri, baş prokuror tutduğu vəzifəyə uyğun olaraq dəyişilir. Vəfat edən şəxsləri də məqsədəuyğun saydığı bir vaxtda prezident yeniləri ilə əvəzləyəcək. Onu da deyim ki, vəfat edən Komissiya üzvlərinin hər üçü öz humanistliyi ilə seçilirdi. Dəfələrlə əfv sərəncamlarının icrasında iştirak zamanı onlarla görüşmüşəm. Hər üçü əfv məsələsinə töhfə verən şəxsiyyətlər idi”.
Tutduğu vəzifədən azad edilən Eldar Mahmudovu yeni yaradılan Dövlət Təhlükəsizlik Xidmətinin rəisi Mədət Quliyevin avtomatik olaraq əvəzləməsi məsələsinə gəldikdə isə S.Məmmədov deyib ki, bu məsələnin də təsdiqi baxımından Sərəncamda ad dəyişikliyi olmalıdır: "Doğrudan da indiki mərhələdə Əfv Komissiyasının tərkibinin yenilənməsi məsələsi aktual mövzudur. Çünki tövsiyələrin hazırlanmasında Komissiyanın tərkibi mühüm əhəmiyyət kəsb edir. Güman edirəm ki, yaxın zamanlarda Əfv Komissiyasının rotasiyasına şahid olacağıq”.
Şəymən
