Dini icmaların ləğv edilməsinə dair səlahiyyətilərin Dövlət Komitəsinə verilməsi təklif olunur.
Dini Qurumlarla İş üzrə Dövlət Komitəsinin sədr müavini Gündüz İsmayılov bildirib ki, Ədliyyə Nazirliyində 2000-ci ilə qədər qeydiyyatdan keçən dini icmaların bəzilərinin hüquqi ünvanları şəxsi ev və ya qarajdır. Ancaq qanunvericiliyə dəyişiklik ediləndən və dini icmalar Dini Komitəyə keçəndən sonra belə hallara yol verilməyib. G.İsmayılov hesab edir ki, dini icmaların dövlət qeydiyyatının ləğvi müəyyən problemlər yaradır: "Belə dini icmaların qeydiyyatını Dövlət Komitəsi ləğv edə bilməz. Bunun üçün Dövlət Komitəsi məhkəməyə müraciət etməlidir. Yaxud qeydiyyatdan keçmiş dini icmalar, dini icmaların sədrləri var ki, artıq illərdir, fəaliyyət göstərmir. Görürsən ki, dini icmanın sədri ölkədə deyil, yaxud ölkədə elmi və digər fəaliyyətlə məşğuldur. Həmin məsciddə başqa bir dini icmanın qeydiyyatı da problemə çevrilir, çünki köhnə dini icmanın sədri hüquqi prosedurlarda iştirakdan imtina edir”. Komitə nümayəndəsi deyib ki, dini icmaların ləğvi məsələsində Dövlət Komitəsinə səlahiyyət verilməlidir.
Komitənin təklifi ilə bağlı "Şərq”ə danışan ilahiyyatçı Rəşad Məmmədov Gündüz İsmayılovun tamamilə haqlı olduğunu deyib.
Hətta ilahiyyatçı bildirib ki, təkcə dini icmalar deyil, ümumilikdə dinlə bağlı bütün səlahiyyətlər Dini Komitəyə verilməlidir: "Azərbaycanda din-dövlət münasibətləri yüksək səviyyədədir. Təbii ki, Komitə dövlətin rəsmi qurumu olduğu üçün dinlə bağlı hər hansı qərar rəsmi şəkildə öz həllini tapacaq. Düşünürəm ki, Komitə icmalar və ya digər dini məsələlərdə dövlətin dinlə bağlı qanunlarını daha ciddi nəzərə alar və fəaliyyətini düzgün istiqamətdə formalaşdıra bilər. Bu baxımdan icmalarla bağlı bütün qərarların qəbuluna birbaşa Dini Komitənin nəzarət etməsini daha məqsədəuyğun görürəm”.
İsmayıl
