Millət vəkili Fazil Mustafa bu günlərdə 162 saylı orta məktəbdə baş verən intihar hadisəsi ilə bağlı açıqlama verib. Deputat şagirdin intiharına səbəb kimi bir çox amilləri qeyd edib. "Bir intihar hadisəsi üzərindən nəticə çıxarmaq düşüncəsində deyiləm. Psixoloji səbəblər də ola bilər, məktəb yoldaşlarının lağlağısı və yaxud şantajı da səbəb ola bilər, ailədəki psixoloji sarsıntı da. Ehtimalları bir tərəfə qoyuram. Ailələrdəki durumu da. Çünki bir çox hallarda yaxınlarımızın belə arzuladığımız ailə qurmasına çox vaxt müdaxilə edə bilmirik. Məktəb direktorları və müəllimlərilə çoxlu təmaslarım olur. Vallah intellektual və virtual olaraq söyləmirəm. Amma vizual olaraq müəllimlərin və direktorların xeyli hissəsi müəllim obrazına bənzəmirlər...”.
Deputatla razılaşmadığını deyən təhsil üzrə ekspert Nadir İsrafilov "Sherg.az”a açıqlamasında bildirib ki, hər hansı bir mənfi hadisə yaşandığı zaman bunu ümumi şəkildə bütün direktor və müəllimlərə aid etmək düzgün deyil. Ekspertin sözlərinə görə, son vaxtlar bəzi məktəblərdə baş verən xoşagəlməz hadisələr təhsil sisteminin nüfuzuna ağır zərbədir:
"Bütün müəllimlərin və direktorların mənfi xüsusiyyətə malik olduğunu demək, olduqca təhlükəli tendensiyadır. Bizim yaxşı müəllimlərimiz və direktorlarımız var. Hesab edirəm ki, hansısa fakta yönəlik ifadə işlədəndə emosiyalara qapılmaq lazım deyil. Hazırda müəllimlərin və məktəblərin nüfuzu bəyənmədiyimiz sovet dövrü ilə müqayisədə xeyli aşağı düşüb. İstəsək də, istəməsək də bunu qəbul etməliyik. Əbəs yerə deyil ki, "Təhsilə dair dövlət strategiya”sında əsas hədəflərdən biri müəllimlərin nüfuzunun qaldırılmasından ibarətdir”.
N.İsrafilov deputatın söylədiklərini müəllimlərə, məktəblərə verilən bir mesaj kimi qəbul etidiyini deyib:
"Bəzən tədqiqatla təhqiqatı qarışdırırıq. Məsələn, 162 nömrəli məktəblə bağlı nə qədər sözlər deyilir, ittihamlar səsləndirilir. Bir məqamı dərk etmirik ki, hansısa məsələyə hüquqi qiymət verilmədən kimlərisə ittiham etmək düzgün deyil. Müəyyən emosiyalara qapılıb həmin direktoru işdən azad etmək üçün canfəşanlıq göstərənlər və müdafiəsinə qalxanlar oldu. Amma hadisələrə emosional yanaşmaqdan uzaqlaşmalıyıq. Baş verənləri sağlam düşüncə və fikirlərlə analiz etmək lazımdır. Gələcəkdə inkişaf və tərəqqimiz üçün imkan daxilində müəllim və məktəb məhfumuna hörmət etməliyik”.
Yeganə Bayramova
