"Rəqabətli iqtisadi mühitin formalaşdırıldığı cəmiyyətlərdə süni qiymət artımı mümkün deyil”.
Bunu Sherg.az-a vətəndaşların süni qiymət artımı ilə əlaqədar Prezident Administrasiyasına şikayətlərin artmasının səbəblərini şərh edərkən iqtisadçı-ekspert Natiq Cəfərli deyib.
O bildirib ki, Azərbaycanda rəqabətli mühit və inhisarçılıqla bağlı problemlər hələ də qalır:
"İnhisarçılıq olan yerdə süni qiymət artımı mümkündür. Avropa və ya Amerika praktikasına baxanda görürük ki, çox zaman orada böyük şirkətləri məhkəmələrə qiymətləri bahalaşdırdığına görə deyil, tam əksinə qiymətləri aşağı salıb, rəqabət mühitini pozduğuna görə verirlər. Onlar ittiham edirlər ki, hansısa şirkət qiymətləri aşağı salıb, müştəriləri cəlb edir, sonradan qiymətləri qaldırır. Nəzarət orqanları bunu təsdiq edirsə, məhkəmələr vasitəsilə həmin şirkətləri ciddi şəkildə cəzalandırırlar”.
N. Cəfərli söyləyib ki, məsələni rəqabətli mühitin artırılması yolu ilə həll etmək olar:
"Rəqabət məcəlləsi qəbul olunmalıdır. Bununla iqtisadi mexanizmləri də həll etmək mümkündür. Rəqabət çoxaldıqca məhsulun keyfiyyəti və qiyməti də rəqabətə uyğun olaraq tənzimlənir. Bu da, vətəndaşların xeyrinə olan məsələdir”.
Qeyd edək ki, Prezident Administrasiyasına 2016-cı ildə daxil olan müraciətlərin bir qismində vətəndaşlar məhsulların və xidmətlərin qiymətlərinin əsassız olaraq qaldırılması hallarından narahat olduqlarını bildiriblər.
Aysel Aslan
