“Materiallar bahalaşdıqca da, evlərin qiyməti qalxacaq. Təsəvvür edin, taxtanın kubu 180 manatdan 300 manata, armaturun qiyməti isə 700 manatdan 1050 manata qalxıb”
Manatın ucuzlaşması fonunda dolların bahalaşması demək olar ki, əksər sahələrdə qiymət artımına səbəb oldu. Doğrudur, ilk olaraq ekspertlər bahalaşmanın mənzil bazarından yan keçəcəyini və mənzil bazarında qiymətlərin düşəcəyini söylədilər. Amma görünən odur ki, ekspertlərin rəyləri özünü doğrultmur.
Artıq mənzil bazarında da qiymətlər getdikcə yüksəlir. Daşınmaz əmlak üzrə ekspert Nüsrət İbrahimov da mənzil bazarında bahalaşmanın baş verdiyini deyib. Ekspert söyləyib ki, kimsə evlərin qiymətinin bundan da aşağı düşəcəyini gözləməsin. Almaq istəyən indi alsın. Onun sözlərinə görə, manatın dəyərdən düşməsi və dolların bahalaşması ilə əlaqədar, tikinti materiallarının qiymətləri günü-gündən qalxır: "Materiallar bahalaşdıqca da, evlərin qiyməti qalxacaq. Təsəvvür edin, taxtanın kubu 180 manatdan 300 manata, armaturun qiyməti isə 700 manatdan 1050 manata qalxıb. Nə qədər ki, bu bahalıq ev qiymətlərinə təsir etməyib, insanlar mənzil almağa tələssinlər”.
Həmsöhbətimiz tövsiyə edir ki, imkanı olanlar evi indi alsınlar, sonra gec olacaq: "Çünki bunun üçün əla fürsətdir. Mənzil qiymətləri ən aşağı səviyyələrə enib. 22-23 faiz ucuzlaşma var. 2-3 ay sonra isə tam fərqli və baha qiymətlər olacaq. Daxili bazarda alqı-satqı manatla aparılır, yerli məzənnə dollar qarşısında dəyər itirdikcə, evlərin manatla qiyməti də o qədər qalxacaq”.
Masazır qəsəbəsində ev-alqı satqısı ilə məşğul olan rieltor Ruslan Turabov isə bildirib ki, həyət evlərində artıq bahalaşma müşahidə olunmağa başlayıb: "Həyət evlərini daha çox maklerlər tikib satırlar. Fərdi tikinti olduğu üçün materiallardakı qiymət artımı evin qiymətində də əks olunur. Binalarda isə vəziyyət bir az fərqlidir. Çünki qiymət kvadrat metrə görə hesablanır”.
Ayyət Əhməd
