Gədəbəy rayonundan olan bir qrup sahibkar Prezident Aparatının qarşısında etiraz aksiyası keçiriblər. Onlar Gədəbəy Rayon İcra Hakimiyyətinin başçısı Ramiz Yediyarovun rayonda yaratdığı xaosa son qoyulmasını istəyirlər.
Öncə qeyd edək ki, Gədəbəy rayonunun icra başçısı Ramiz Yediyarov Bakıda keçirilən ötən aksiayada etirazını bildirən sahibkar Rasim Hərriyevi həbs etdirib.
Şikayətçi olan sahibkarların sözlərinə görə, icra başçısı etirazını bildirənləri həbs etdirəcəyini deyib. Rayonda iclas keçirərək, sakinləri hər hansı problemlə bağlı yuxarı instansiyalara etirazını edəcəyi təqdirdə, həbs olunacağı ilə hədələyib. Növbəti dəfə sahibkar Oqtay Əliyevi həbs etdircəyini bildirib.
Sahibkar Oqtay Əliyev tikilməkdə olan və ona məxsus istirahət obyektinin rayon icra hakimiyyətinin qərarı ilə heç bir əsas olmadan söküldüyünü bildirdi: "Qalakənd meşə zonasında istirahət mərkəzi tikdirməyə başladım. Ekologiya və Təbii Sərvətlər Nazirliyinin sərəncamında olduğu üçün qanuni sənədləşmə aparıldı və tikinti üçün icazə aldım. Həmin sərəcmana uyğun olaraq obyekti tikdirməyə başladım. Həmin ərəfədə Gədəbəy Rayon Icra Hakimiyyəti başçısının müavinləri tikintini dayandırdı. Bu zaman Qüdrət Paşayevlə görüşdüm və razılıq əldə etdikdən sonra işimə başladım. Lakin bir müddətdən sonra 2014-cü ilin iyulun 14-də xəbərim olmadan obyektimi yerlə-yeksan etdilər. Səbəb isə onların tələb etdiyi məbləği verməməyim oldu. İcra Hakimiyyətindən Rüstəm Nağıyev isə mənə dedi ki, əgər dediyimiz məbləği verməsən uçuracağıq. Mən isə bildirdim ki, siz qanunsuz olaraq söküntü etsəniz, mən dövlətin qanunları ilə haqqımı tələb edəcəyəm, bu işi yerdə qoymayacağam. İyulun 23-də icra nümayəndələri gəlib obyekti sökdülər. Bununla bağlı məhkəmə də oldu və mənim xeyrimə hökm çıxarıldı. Lakin hələ də icra başçısı Ramiz Yediyarov məhkəmə tərəfindən kəsilən təzminatı ödəmir. İcra başçısı Ramiz Yedigarov rayonda iclaslar keçirir və mənim həbs olunacağımı deyir. Mən Rusiyada öz zəhmətimlə qazandığım pullarla doğma vətənimdə iş qururam, bunlar isə mənə imkan yaratmaqdansa, qarşımı kəsirlər”.
Oqtay Əliyev bütün bu hadisələrlə bağlı müxtəlif dövlət qurumlarına çoxsaylı müaciətlər etdiyini dedi: "Şikayətlərimlə bağlı Gədəbəy Rayon Prokurorluğu cinayət işinə başlayıb və rədd edib. Prokurorluğun cinayət işində yazılıb ki, həqiqətən də Oqtay Əliyevə məxsus olan obyekt Gədəbəy rayonunun icra nümayəndələri tərəfindən sökülüb. Ekologiya və Təbii Sərvətlər Nazirliyi də, söküntünün icra nümayəndələri tərəfindən aparıldığına dair sənəd verib. Gəncə İnzibati-İqtisad Məhkəməsi 5 dəfə sənəd verərək bildirib ki, söküntü Gədəbəy İcra Hakimiyyəti əməkdaşları tərəfindən aparılıb. Bütüb bunlara baxmayaraq, icra başçısı Ramiz Yedigarov deyir ki, sizi həbs etdirəcəm, gedin nə bilirisiniz, onu da, edin. İndi isə Prezident Aparatına gəlmişik ki, kimsə bizi qəbul eləsin, şikayətimizə baxsın”.
Oqtay Əliyev adlı başqa bir sahibkar da ona məxus olan mağazanın xəbərdarlıq edilmədən söküldüyünü dedi: "İcra başçısı Ramiz Yediyarov obyektimi sökdürdükdən sonra onun barəsində
çoxsaylı şikayətlər etdim. Lakin icra başçısı məni həbs etdirdi. 15 sutka həbsdə qaldım. Bu prosesdən sonra Prezident Aparatının qəbul şöbəsində Tağı Tağıyevlə görüşdüm və başıma gələn hadisəni danışdım. O isə mənə bildirdi ki, şikayətinizə baxılacaq. İcra Hakimiyyətində Qüdrət və Zülfüqar adlı icra nümayəndələri mənə hədə-qorxu gəlirlər. Rayonda icra başçısı Ramiz Yedigarov tərəfindən hər an həbs olunacağımı hiss edirəm”.
Sahibkarla yanaşı, digər problemləri olan bir neçə Gədəbəy rayon sakini də şikayətlərini bildiriblər. Şikayətçilərdən Rəşad Səfərov fərdi yaşayış evlərinin tikintisinə də, icra nümayəndələri tərəfindən əl qoyulduğunu bildirdi: "Bizim burada toplaşmağımızın səbəbi Gədəbəy İcra Hakimiyyətinin etdiyi qanunsuzluğu dövlət başçısına çatdırmaqdır”.
Qeyd edək ki, Ramiz Yaediyarov Gədəbəy rayonuna rəhbərlik etdiyi 2012-ci ildən etibarən, mütəmadi olaraq yerli iş adamlarına müxtəlif problemlər yaratması, rayonda öz biznes maraqlarını təmin etmək üçün digər sahibkarların biznes fəaliyyətlərini əngəlləməsi və hətta vətəndaşlara məxsus kommersiya obyektlərinin qanunsuz olaraq sökülməsi, torpaq sahələrinin onların əllərindən alınması kimi əməlləri barədə mətbuatda dəfələrlə yazılıb. Bununla belə, özbaşınalıqlara məruz qalan iş adamları artıq uzun müddətdir ki, ən müxtəlif instansiyalara, o cümlədən hüquq-mühafizə orqanlarına, məhkəmələrə, kütləvi informasiya vasitələrinə və digər qurumlara çoxsaylı müraciətlər etsələr də, heç bir nəticəsi olmamışdır. Ramiz Yediyarovun qanunsuz əməllərindən ölkə rəhbərliyinə şikayət etmək üçün bir araya gəlmiş sahibkarlar bundan sonra mütəşəkkil formada, birgə addımlar atmaq qərarına gəlsələr də, nəticə etibarı ilə onlardan hər birinin öz konkret problemləri var.
