Son günlər paytaxtda və bölgələrdə qızmar hava şəraiti hökm sürməkdədir. Hətta bir neçə gündür ki, anormal istilər müşahidə olunur. Temperatur 39-40 dərəcəyə qədər yüksəlir.
Hər zaman olduğu kimi bu il də anormal istilərdən əziyyət çəkənlərin sayı yetərincə çoxdur. Xüsusilə, təzyiqi yüksək olanlar və qan azlığından əziyyət çəkənlər hədsiz isti havaya tab gətirə bilmir. Nəticədə belə həssas adamların sağlıq durumunda müəyyən problemlər yaşanır.
Bəs, günvurmadan qorunmaq üçün nə kimi tədbirlər görülə bilər?
Sualımızı cavablandıran həkim-allerqoloq Şahvələd Məmmədov "Sherg.az”a açıqlamasında günvurmanın adi bir hal olmadığını deyib:
Həkim qeyd edib ki, günvurma orta, ağır və ən ağır olmaqla 3 dərəcəyə bölünür:
"Bəzən gənclər saatlarla gün altına olurlar, özlərini yandırırlar. Lakin Amerika və Avropa təcrübələrində də yazılıb ki, günəş şüaları altında 1 saatdan artıq qalmaq gələcəkdə dəri xərçənginin yaranmasına səbəb ola bilər. Anormal istilərdə müəyyən xəstəliyi olan şəxslərin günəş altında olması məsləhət deyil. Şəkər və xərçəng xəstələri, qan azlığı olanlar, azyaşlı uşaqlar və hamilə qadınların da günün altında qalması yolverilməzdir. Çünki bu günkü gündə 39-40 dərəcə istlik iyun ayı üçün xarakterik deyil.
Yayda ən çox rastlaşdığımız hadisələrdən biri də qida zəhərlənmələridir. Qida məhsulları düzgün istifadə olunmaması baxımından təhlükəli olur.
İsti havalarda marketlərə qatıq və mayonezləri gətirirlər. Həmin məhsullar gətirilənə qədər yetərincə günəş altına qalır. 35-36 dərəcə temperatur kifayətdir ki, həmin məhsullar insanların zəhərlənməsinə şərait yaratsın. Ona görə, əhali bu kimi durumlarda ehtiyatlı olmalıdır.
Məsləhətdir ki, belə havalarda çoxlu maye qəbul etsinlər. Bakı böyük şəhərdir və ətrafda yaşıllıq azdır. Şəhərə çıxarkən hər kəsin əlində sərin suların olması lazımdır. Günəşdən qorunmaq üçün xüsusi kepkalardan və qoruyucu şalvarlardan istifadə edilməsi məsləhətlidir”.
Yeganə Bayramova
