Rusiya Prezidenti Vladimir Putin Suriya "lideri” Bəşər Əsədi öz ölkəsində yerləşdirə biləcəyini bəyan edib. Almaniyanın "Bild” qəzetinə müsahibə verən Putin deyib ki, həmkarı Bəşər Əsədin aqibətini müzakirə etmək hələ çox tezdir. Amma bir gün Əsəd öz ölkəsini tərk etmək qərarına gələrsə, Rusiyada asanlıqla siyasi sığınacaq ala bilər:
"Əsədin ölkəmizə gəlməsi FTB agenti Edvard Snoudenin Rusiyadan sığınacaq almasından daha asandır. Amma bayaq dediyim kimi, bu məsələnin vaxtı hələ gəlməyib. Əvvəlcə Suriyada terror bitməli, ölkə stabil olmalı və demokratik seçki keçirilməlidir”. Məlumat üçün bildirək ki, Qərb mətbuatı bir neçə gün əvvəl Suriya məsələsi ilə bağlı böyük dövlətlərin razılığa gəldiyini və 2017-ci ildə Bəşər Əsədin hakimiyyəti təhvil verəcəyini yazmışdı. Məsələ ilə bağlı "Şərq”ə danışan politoloq Qabil Hüseynli deyib ki, Kreml rəhbəri Suriya məsələsinin onun üçün ziyanlı olduğunu anlamağa başlayıb. Çünki hər gün Suriyaya 10 milyonlarla dollar vəsait sərf olunur: "Nəzərə almaq lazımdır ki, 2016-cı il Rusiya iqtisadiyyatı üçün çox gərgin başlayıb. Belə şəraitdə Rusiya yaxşı başa düşür ki, Moskva-Əsəd əlaqələrinin perspektivi yoxdur. Xüsusilə İran qoşunları Suriyadan çəkiləndən sonra Rusiya tamamilə çıxılmaz duruma düşüb”. Politoloqa görə, Suriyada demokratik seçkilərdən danışmaq boş söhbətdir: "Həmin "demokratik” seçkiləri bir il bundan qabaq Bəşər Əsəd keçirib. Özü də alternativsiz və sadəcə Dəməşq şəhərində keçirib. Hazırda Suriya paramparçadır. Ölkənin bir qismi İŞİD-in, digər qismi isə Suriya Azadlıq Ordusunun əlindədir. Əgər Əsədin hakimiyyəti Dəməşqdən kənara çıxa bilmirsə, bu şəraitdə hansı demokratik seçkidən danışmaq olar?”. Q.Hüseynli deyib ki, Səudiyyə Ərəbistanı rəsmiləri Əsəd haqqında danışarkən ən radikal variantlara belə gediləcəyini, hətta onun öldürüləcəyini belə söyləməkdən çəkinmirlər: "Putin bilir ki, Əsədin siyasi sonu sığınacaq istəməklə bitəcək. Ona görə də indidən bunu dilə gətirir. Amma Amerikanın satqın kəşfiyyatçısı Edvard Snoudenlə Əsədi eyniləşdirmək tamamilə yanlışdır. Çünki Snouden öz dövlətinin xüsusi xidmət orqanlarının müəyyən sirlərini yayıb. Lakin Bəşər Əsəd artıq beynəlxalq cinayətkara çevrilib. Suriyadakı bütün xoşagəlməz hadisələr, minlərlə suriyalının öldürülməsi, 5 milyondan çox insanın məcburi qaçqına çevrilməsi birbaşa Əsədin suç dəftərinə yazılıb. Bütün bunlara görə o, cavab verməli olacaq. Yuqoslaviyanın sabiq prezidenti Slobodan Miloşeviçi də gizlətmək istəyirdilər, axırı nə oldu? Onu tutdular və ömürlük həbs cəzası verdilər. Daha sonra isə həbsxanada ürəyi partlayaraq öldü. Bəşər Əsəd də Rusiyada gizlənib-gizlənməməsindən asılı olmayaraq, öz əməllərinə görə layiqli cəzasını alacaq. Əgər beynəlxalq məhkəmə onun haqqında qərar çıxararsa, Rusiya bu qərara boyun əymək məcburiyyətində qalacaq”.
İsmayıl
