"Rəsmi Tehran Dağlıq Qarabağ münaqişəsinin başladığı ilk gündən böhranın yayılmasının qarşısını almağa və ixtilafın həllinə çalışıb”.
Bu barədə İran Xarici İşlər Nazirliyinin sözçüsü Hüseyn Cabiri Ənsari bildirib. Onun sözlərinə görə, keçmişə nəzər salsaq, görərik ki, İran həssas vaxtlarda qonşu ölkələr Azərbaycan və Ermənistan arasındakı ixtilafın qarşısını almağa çalışıb: "Hazırda Azərbaycan və Ermənistan istəyərsə, İran bu münaqişənin həllində rol almağa və vasitəçilik etməyə hazırdır”.
XİN sözçüsünün açıqlamasını şərh edən Vətəndaş Həmrəyliyi Partiyasının (VHP) sədri, sabiq millət vəkili Sabir Rüstəmxanlı isə bu məsələdə cənub qonşumuzun sanballı təsirinin olduğuna inanmır. O, "Şərq”ə söyləyib ki, Ermənistan öz siyasətində bir sıra ölkələrə söykənib və onlarla əməkdaşlıq edir: "Birdəki düşmən ölkənin Qarabağ məsələsində əsas silahı erməni diasporudur. O diaspor nəinki İranın təklifini qəbul edər, heç Ermənistan dövlətinin özünün fikirləri ilə hesablaşmır. Belə olan halda rəsmi Tehranın nəsə ciddi bir iş görəcəyinə inanmıram. Cənub qonşumuz sadəcə danışıqlar prosesinə qatıla bilər”.
Təşkilat sədri onu da diqqətə çatdırıb ki, Cənub qonşumuz özünü təsir gücü olan beynəlxalq qüvvə kimi göstərməyə çalışır: "Məlum bəyanat da daha çox özünü reklam xarakteri daşıyır. Amma burada İranlıq bir iş yoxdur. İndiyə qədər olan proseslər göstərir ki, İran sözügedən münaqişədə heç vaxt Azərbaycanın mövqeyini ciddi şəkildə müdafiə etməyib. Həmişə daha çox
Ermənipərəst mövqedə dayanıb. Gərək İran əvvəlcə öz mövqeyini müəyyənləşdirsin və bundan sonra belə bəyanatlar versin”.
Ayyət Əhməd
