Yanvarın 16-da günorta saatlarında metronun "Elmlər Akademiyası” stansiyasının qarşısında təxminən 65-70 yaşlı kişi qəfildən huşunu itirərək yıxılıb. Yaxınlıqda olan adamlar hadisə yerinə təcili tibbi yardım çağırıblar.
Lakin həkimlər hadisə yerinə gələndə artıq gec olub. Yıxılan şəxs dünyasını dəyişib. Sonradan məlum olub ki, həmin şəxs "Respublika” qəzetinin əməkdaşı, jurnalist Sabir Mustafayevdir. 60 yaşlı S.Mustafayev Cəlilabad rayonunda doğulub.
Mərhumun meyiti morqa aparılıb. Şahidlərin verdiyi məlumata görə, Sabir Mustafayev parka qaçaraq gəlib. Bu zaman baş verənlərin yaxınlıqda olan təhlükəsiz şəhər kameralarında görüntüləndiyi də ehtimal olunur. Hadisə yerinə polis əməkdaşları, kriminalist-ekspertlər cəlb edilib. Meyitin üzərinə ilkin baxış keçirilib. Onun yıxılaraq dünyasını dəyişdiyi ehtimal edilib.
Amma mərhumun yaxınları jurnalistin döyülərək öldürüldüyünü iddia edib. Mərhumun qardaşı Səxavət Mustafayev mediaya məlumat verib ki, Sabir Mustafayev ədavətdə olduğu şəxs tərəfindən öldürülüb.
Qeyd edək ki, Yasamal rayon prokuroru, eləcə də "Respublika” qəzetinin baş redaktoru Teymur Əhmədov və qəzetin əməkdaşları da hadisə yerində olublar. Meyit müayinə olunması üçün məhkəmə-tibbi ekspertizasına aparılıb. Sabir Mustafayevin, deyildiyi kimi, başqası tərəfindən öldürüldüyü və ya qəfildən səhhətinin pisləşməsi səbəbindən dünyasını dəyişdiyi aparılan istintaq araşdırmalarından sonra dəqiqləşdirilib.
Yasamal Rayon Prokurorluğu araşdırma nəticəsində jurnalistin küçədə döyülərək öldürülməsini təkzib edib. Rayonun prokurorluğundan bildirilib ki, S.Mustafayevin öldürülməsi iddiaları əsassızdır və öz təsdiqini tapmayıb.
Prokurorluğun məlumatına görə, jurnalistin küçədə huşunu itirərək yıxılması və nəticədə dünyasını dəyişməsi anı yaxınlıqda olan insanların gözü qarşısında baş verib: "Onun döyülərək öldürülməsi iddiası yalandır. Ona görə də jurnalist Sabir Mustafayevin ölüm faktı ilə bağlı cinayət işi açılmayıb”.
Aysel Aslan
