Azərbaycan Hava Yolları (AZAL) QSC-nin təyyarə biletlərinin endirimləri müştərilərin ümidlərini doğrultmayıb. AZAL-ın son qiymət endirimi kampaniyası sosial şəbəkələrdə müzakirə mövzusuna çevrilib. Bəzi sosial şəbəkə istifadəçiləri hesablamalar apararaq, qeyd ediblər ki, AZAL-ın endirimli qiymətləri əslində, normal qiymətlərdən daha baha başa gəlir.
İqtisadçı-ekspert Natiq Cəfərli də bu günlərdə mətbuata açıqlamasında AZAL-ın qiymət siyasətində "low-kost” məntiqinin itdiyini bəyan edib. Eyni zamanda iqtisadçı AZAL-ın yerli inhisarçı şirkət olduğunu vurğulayaraq, qurum öncə qiymətləri avro ilə hesablamasına aydınlıq gətirsin, deyib.
İqtisadçı-ekspert Nazim Məmmədov isə digərlərindən fərqli olaraq indiki reallıqda AZAL-ın qiymət siyasətinin qəbul edilən olduğunu hesab edir: "Manatın stabil olan vaxtlarında AZAL-ın qiymətləri həddindən artıq baha idi. Haqlı olaraq da vətəndaşlarımız hansısa xarici ölkəyə getmək üçün qonşu Gürcüstanın və Ukraynanın hava xətlərindən istifadə edirdilər. Obyektiv səbəbləri də Azərbaycandan uçuşun ikiqat bahalı olması idi. Ancaq manatın kəskin ucuzlaşmasından sonra AZAL-ın mövcud qiymət siyasətinə haqq qazandırmaq olar. Çünki uçuşlar ikitərəfli həyata keçirilir və səfər etdikləri ölkələrdə sərnişinlərə xidmət göstərilir. Əgər endirim kampaniyalarında qiymətlər doğrudan da bahadırsa, bu qurumu tənqid etmək üçün əsas verir. Əks təqdirdə mən AZAL-a haqq verirəm. Yenə də deyirəm ki, devalvasiyadan əvvəl xaricə uçuş biletləri çox baha idi və AZAL bunu guya xidmətin yüksək, yeməklərin keyfiyyətli olması ilə izah edirdi. Əslində isə bu bəhanələrin hər biri yersiz idi və qiymətlər doğrudan da baha idi. Amma bu gün üçün manatla olan qiymətin bahalaşmasının obyektiv səbəbləri olduğunu düşünürəm. Yox əgər qiymət artımı dollar ekvivalentində bahalanıbsa, bu artıq vətəndaşlara qarşı haqsızlıqdır.
"Azərbaycan Hava Yolları” QSC-nin prezidentinin ictimaiyyətlə əlaqələr üzrə köməkçisi Paşa Kəsəmənski isə açıqlamasında endirimlərin yaxın zamanlarda da davam edəcəyini, eləcə də ümumi qiymətlərə yenidən baxılacağını bildirib: "Bizdə, eləcə də bir çox ölkələrdə Beynəlxalq Aviasiya Təhlükəsizliyi Dəyərləndirməsi (İASA) adlı qurumun tələblərinə uyğun olaraq, biletlərin qiyməti avro ilə hesablanır. Biz bu yaxınlarda elan etmişik ki, qiymətlərə yenidən baxacağıq və yeni qiymətləri müəyyən edəcəyik. Bəzi uçuşların 89 avroya endirilməsi bizim sonuncu endirimimiz deyil, bundan sonra da belə kampaniyalarımız olacaq”.
Sosial şəbəkələrdə deyilənlərin həqiqəti əks etdirmədiyini deyən P.Kəsəmənskinin sözlərinə görə, media baqaj xidmətini və yeməyi də üstünə gələndə əvvəlki qiymətdən çox etdiyini yazır: "Lakin bu, belə deyil. Əgər tək adamı hesablasaq, fərq bir qədər az alınır. Ancaq bir ailə gedirsə, bir neçə nəfər bir baqaj üçün ödəniş edir, bu zaman daha sərfəli olur. İnsanlar var ki, baqaj xidmətindən istifadə etmirlər, yemək istəmirlər. Bu, insanın seçimindən asılıdır. Ən vacibi odur ki, bu fərq "ekonomklas”ın 30 faizinə aiddir. Qalan 70 faizin qiyməti ilə müqayisə etsəniz, özünüz fərqi görəcəksiniz”.
Şəymən
