Əmək və əhalinin sosial müdafiəsi naziri Səlim Müslümov mətbuata açıqlamasında ünvanlı sosial yardım verilən zaman istehlak kreditləri olanlara tətbiq olan məhdudiyyətlərin aradan götürüləcəyini bəyan edib.
Nazirin sözlərinə görə, ölkə başçısının tapşırığına əsasən ünvanlı sosial yardımın təkmilləşdirilməsi istiqamətində işləri davam etdiririk: "Hazırda bu prosesin avtomatlaşdırılması istiqamətində işlər görülür. Proqram təminatları hazırdır, yaxın vaxtlarda Bakının 2 rayonunda test işlərinə start veriləcək və Nazirlər Kabinetinin müvafiq qərarı qəbul olunacaq. Ünvanlı sosial yardımın təyin olunması və bunun üçün müraciət edilməsi və yaxud imtina edilməsi qaydaları yeni avtomatlaşdırılmış qaydalarla aparılacaq. Qaydalara əsasən, kredit öhdəliyinə görə olan məhdudiyyət aradan qaldırılacaq. Yeni qaydalar yaxın vaxtlarda Nazirlər Kabineti tərəfindən təsdiqlənəcək. Bu, onunla bağlıdır ki, müəyyən qrup insanlar var ki, zamanında banklardan istehlak kreditləri götürüblər, bu gün isə həmin kreditləri qaytara bilmirlər. Eyni zamanda ailənin gəlirləri çox aşağı olduğu üçün onların kredit öhdəlikləri həmin ailənin gəlirinin 50 faizdən yuxarı çıxır. Nəticədə onlar nə krediti ödəyə bilir, nə də ünvanlı sosial yardım ala bilirlər. Bu da onların müəyyən qədər yaşam şəraitlərini xeyli çətinləşdirir. Ona görə, ölkə Prezidentinin tapşırığına əsasən, bu məhdudiyyətlər götürüləcək. Bununla, həqiqətən gəlirləri aşağı olan və yaşam şəraitində problemləri olan ailələr belə istehlak kreditləri olmalarına baxmayaraq ünvanlı sosial yardım sisteminin üstünlüklərindən istifadə edə biləcəklər”.
Sözügedən dəyişiklikləri şərh edən İqtisadi Sosial İnkişaf Mərkəzinin (İSİM) rəhbəri, iqtisadçı-ekspert Vüqar Bayramovun sözlərinə görə, ünvanlı sosial yardım verilən zaman istehlak kreditləri olanlara tətbiq olan məhdudiyyətlərin aradan qaldırılması təqdirəlayiq haldır: "Əslində vətəndaşın bankdan kredit alması onun varlı olması anlamına gəlməməlidir. Bəzi insanlar ailə üzvlərindən kiminsə müalicəsi, həmçinin də bu kimi digər vacib xərclərin qarşılanması üçün kredit götürmək məcburiyyətində qalır. Düzdür, ödəmə qabiliyyəti olduğu üçün əlavə xidmətlər üçün kredit götürən insanlar var. Amma hamını eyniləşdirib, krediti olan insanları sosial yardımdan məhrum etmək düzgün yanaşma deyildi. Birmənalı olaraq, ünvanlı sosial yardım verilən zaman istehlak kreditləri olanlara tətbiq olan məhdudiyyətlərin aradan götürülməsinə ehtiyac vardı. Güman etmirəm ki, bu qadağanın aradan qaldırılmasının hansısa mənfi təsirləri ola bilər. Əksinə, kifayət qədər müsbət təsirləri olacaq. Artıq kredit götürmək istəyən şəxslərin "ünvanlı sosial yardımdan istifadə edə bilməyəcək” kimi bir narahatlığı olmayacaq”.
Şəymən
