Gürcüstan milli valyutası ABŞ dolları qarşısında rekord həddə ucuzlaşıb. APA -nın yerli bürosu xəbər verir ki, Gürcüstan Mərkəzi Bankının bu gün saat 17:00-da müəyyənləşdirdiyi rəsmi məzənnəyə əsasən, 1 dollar 2,93 lariyə bərabər olub. Ötən gün isə 1 dolların alışı 2,9171 lari məzənnəsi ilə həyata keçirilib.
Lari avro qarşısında da ucuzlaşıb. Rəsmi məzənnəyə əsasən 1 avronun alış qiyməti 3,2637 lari olaraq müəyyənləşib. Ötən gün avronun lariyə qarşı məzənnəsi isə 3,2496 lari təşkil edib.
Gürcüstanda gün ərzində dolların bahalaşması ən çox kommersiya banklarında hiss olunub. Məsələn, “TBC Bank”ın gün ərzində valyuta mübadiləsi əməliyyatlarında 1 dolların satışı 2,99 lari ilə həyata keçirilib ki, bu da Gürcüstan milli valyutası tarixində anti-rekorddur.
