"Məktəb və bağçalar "donuz qripi”nə görə dezinfeksiya olunacaq. Rayonlarda virusla bağlı təhlükə aşkarlanan və ağır vəziyyətdə olan xəstələr dərhal Bakıdakı xəstəxanalarda qospitalizə ediləcək.
Artıq səhiyyə nazirinin müavini Abbas Vəlibəyov "donuz qripi” ilə əlaqədar əmr imzalayıb”. Bu barədə Respublika Taun Əleyhinə Stansiyasının şöbə müdiri Rita İsmayılova bildirib. Onun sözlərinə görə, yanvarın 19-da imzalanan əmrə əsasən, ölkədəki bütün məktəbəqədər və ümumtəhsil müəssisələrində ciddi dezinfeksiya işlərinin aparılması ilə bağlı tapşırıqlar verilib: "Hazırda ölkə ərazisində "donuz qripi” A (H1N1) virusu ilə bağlı təhlükəli hala rast gəlinmədiyini qeyd edən şöbə müdiri bildirib ki, əmrdə uşaqlar arasında həkim yoxlamalarının aparılması, xəstə uşaqların sağlam uşaqlardan təcrid olunması ilə bağlı göstərişlər verilib. Bununla yanaşı qeyd edək ki, məktəblərdə dezinfeksiyanın hansı formada aparılacağının açıqlanmaması valideynlərin narahatlığına səbəb olub. Onlar bildirirlər ki, dezinfeksiya ilə əlaqədar övladları bir neçə gün dərs buraxacaq ki, buna görə də məktəbə 100 manat cərimə ödəməli olacaqlar. Məsələni aydınlaşdırmaq məqsədilə tanınmış təhsil eksperti Nabatəli Qulamoğlu ilə əlaqə saxladıq. O, "Şərq”ə söylədi ki, sağlamlıq olmayan yerdə nə təhsil, nə bilik, nə də tərbiyə var: "Digər tədbirlər sağlamlığa dair görülən işlərə tabe olmalıdır. Əhalinin sağlamlığına təsir göstərən hansı amil varsa, mütləq qarşısı alınmalıdır. Məktəblərin dezinfeksiyası aparılacaqsa, bunu problem etmək olmaz. Ona görə ki, növbəti təhsil illərində həmin gecikmə halları nəzərə alınacaq və tətil gününü azaldacaqlar və bununla da məsələ bitəcək. Elə də problem deyil. İstənilən halda "donuz qripi” təhlükəsi varsa, ona qarşı mütləq tədbirlər görülməlidir”.
Ayyət Əhməd
