“Elə inkişaf etmiş ölkələr var ki, valyutaları ABŞ dolları qarşısında rəqəm olaraq bizim manatdan daha ucuz görünür”
Gürcüstan milli valyutasını dəyişir. Bu ölkənin Milli Bankı (MB) cari ilin fevralında dövriyyəyə yeni 20, 50 və 100 lari əsginazları buraxacaq. Bu haqda MB-nin prezidenti Georgi Kadaqidze bildirib. Onun sözlərinə görə, yeni əsginazlar dövriyyəyə mərhələ-mərhələ buraxılacaq:
"Yeni pulların üzərində Gürcüstan maliyyə nazirinin imzası olmayacaq. Yeni əsginazlar lazımi dərəcədə müdafiə olunur, hətta görmə qüsuru olanlar üçün də ayrıca elementlər həkk edilib. Yeni əsginazların dizayneri Baçana Malazoniyadır”. Qeyd edək ki, son günlər Azərbaycanın da yeni əsginazlar dövriyyəyə buraxmasına dair sosial şəbəkələrdə məlumatlar yayılırdı. Məsələyə reaksiya verən Azərbaycan Mərkəzi Bankından bildirilib ki, hələlik əsginazların dizaynının yenilənməsi gözlənilmir: "Belə hal olarsa, ilk öncə MB-nin özü məlumat yayacaq”.
Bunun əsassız iddia olduğunu söyləyən tanınmış iqtisadçı Natiq Cəfərli "Şərq”ə açıqlamasında qeyd edib ki, Azərbaycanın problemi manatın rəngində və ya sıfırlarının sayında deyil. Manatın problemi ölkəyə valyuta axınının kəskin azalması və xərclərin getdikcə artması ilə əlaqədardır: "Manatın dizaynını da dəyişsələr, sıfırlarını da silsələr, bu, heç nəyi dəyişməyəcək. Valyuta bazarında olan problemləri dəyişməyəcək. 20 və 50 lariləri bu gün də, sabah da eyni qalacaq. Sadəcə olaraq Gürcüstanı daha yaxşı tanıtmaq üçün, larinin üzərinə tarixi abidələrini həkk etdirəcəklər. Bu bir növ reklam xarakterli aksiyadır. Amma bunun maliyyə bazarı və makroiqtisadi göstəricilərlə heç bir əlaqəsi yoxdur. Azərbaycanda da qeyd etdiyim kimi, manatın rəng və dizaynının dəyişməsinin ölkədəki vəziyyətlə əlaqəsi yoxdur”.
Bununla yanaşı, ekspert əlavə edib ki, 2005-ci ildə Azərbaycan doğru addım ataraq, sıfırları silib nominasiyaya getdi: "Yeni manatı dövriyyəyə buraxmışdı. Həmin dövrə görə, bu, doğru addım idi. Deyim ki, Azərbaycan manatı indiki şəraitdə dünya valyutalarına qarşı rəqəm olaraq, təhlükəli deyil. Dünyanın elə inkişaf etmiş ölkələri var ki, valyutaları ABŞ dolları qarşısında rəqəm olaraq bizim manatdan daha ucuz görünür. Məsələn, Norveçdə də vəziyyət belədir. Yəni söhbət manatın rəngindən deyil, iqtisadi situasiyadan gedir. Azərbaycanda manatın problemi qlobal makroiqtisadi göstəricilərlə bağlıdır. Ölkənin gəliri azalıb, xərclər isə artıb”.
Ayyət Əhməd
