"Ölkədə qiymətlərin kəskin bahalaşmasının heç bir iqtisadi əsası yoxdur. Sadəcə, böyük monopolist qüvvələrə demək lazımdır ki, az oğurlayın”.
Bu sözləri "Şərq”ə Azərbaycan Sosial Demokrat Partiyasının (ASDP) sədri, millət vəkili Araz Əlizadə qənaət rejiminə keçidlə bağlı danışarkən deyib. Onun sözlərinə görə, manatın ucuzlaşması o demək deyil ki, qiymətlər bahalaşmalıdır: "Bu, insafsızlığın nəticəsidir”.
Parlamentari diqqətə çatdırıb ki, monopolistlər öz tamahlarını azaltmalıdırlar: "Bax bu, ən böyük qənaət olar. Ölkəmizdə qiymət artımı süni şəkildə aparılır. Göyərtinin qiyməti bahalaşıb. Mən anlamıram, bu göyərti Amerikadan gəlir ki, dollar buna təsir göstərsin? Ötən il yığılan alma Amerikaya getdi qayıtdı ki, onun qiyməti qalxdı? Yoxsa inəklərimiz Amerikada sağılır və ya ətimiz oradan kəsilib gəlir? Qənaəti adi vətəndaşlardan tələb etmək düzgün deyil. Monopolistlər acgözlük etməsələr, hər şey düzələr”.
Çörəyin qiymətinin bahalaşmasına diqqət çəkən təşkilat rəhbəri bildirib ki, bunun qarşısını almaq üçün monopolistlərə qarşı kəskin mübarizə aparılmalıdır: "Antimonopoliya komitəsi öz sözünü deməlidir. Məsələn, tutaq ki, bir adam ötən ilin noyabrında xaricdən 5 manatdan mal gətirib. Onu beş 5 manatdan gətiribsə, rüsumu 5 manatlıq malın rüsumu kimi ödəyibsə, indi o
adamın nə ixtiyarı var ki, onu 8-9 manata satsın. Bu artıq oğurluq deməkdir. Əlbəttə, həmin pul xalqın cibindən oğurlanır. Antinhisar komitəsi, vergi və iqtisadi cinayətlər idarəsi işbazlara qarşı güclü mübarizəyə başlamalıdır. Bu onların işidir. Monopolistlərin qarşısı alınmasa, işlər çətinləşəcək”.
A.Əlizadə bəyan edib ki, dövlət başçısı əlindən gələni edir: "Azərbaycan xalqına yalnız dövlət başçısı yaxşılıq edir”.
Ayyət Əhməd
