"Dağlıq Qarabağla bağlı danışıqlar nəticə vermədikcə müharibə riski hər zaman yüksək olacaq”.
Bu sözləri "Sherg.az”a Atlas Araşdırmalar Mərkəzinin rəhbəri, politoloq Elxan Şahinoğlu deyib.
Politoloq vurğulayıb ki, torpaqları işğal altında olan istənilən ölkənin ordusu hər zaman müharibəyə hazır olmalıdır:
"Düşmən tərəf fikirləşməlidir ki, müharibədən çəkinirsə, işğala da son qoymalıdır. Çox təəssüf ki, ermənilər işağlı davam etdirirlər. Gah müharibədən, gah da sülhdən danışırlar. Amma başa düşmürlər ki, Azərbaycan xalqı və ordusu heç vaxt işğalla barışmayacaq.
Hər il yeni hərbi texnikalar alırıq, ordumuzu daim gücləndiririk. Bunların hamısı ordumuzun müharibəyə hazırlıqlı olduğunu göstərir. Müəyyən razılıq əldə edilmədikdə isə müharibənin baş verməsi qaçılmazdır. Müharibə başlayanda ən böyük yük məhz ordunun üzərinə düşür. Ona görə də, milli ordumuzun hərtəfəli şəkildə hazırlıqlı olması əsas məqsədlərimizdən biridir”.
Qeyd edək ki, Müdafiə Nazirliyinin mətbuat xidmətinin rəisi, polkovnik Vaqif Dərgahlı Azərbaycan Ordusunun sülhə yox, müharibəyə hazır olduğunu bildirib. Polkovnikin sözlərinə görə, Ermənistan sülh istəyirsə, erməni əsgəri qeyd-şərtsiz Azərbaycan torpaqlarından çıxmalıdır.
Yeganə Bayramova
