Vətəndaş və İnkişaf Partiyasının sədri Əli Əliyev Milli Məclisdə təmsil olunan 3 deputatla bağlı maraqlı açıqlama verib. Partiya sədri deyib ki, Azərbaycan Sosial Demokrat Partiyası, Vəhdət Partiyası və Vətəndaş Birliyi Partiyasının sədrləri eks-prezident Ayaz Mütəllibovun parlamentdəki "kadr”larıdır. O bunu həmin adamların Rusiya meyilli olmaları ilə əlaqələndirib.
Ə.Əliyev bildirib ki, Ayaz Mütəllibov müxtəlif zamanlarda Vətəndaş Birliyi Partiyasının və ASDP-nin həmsədri olub. Vəhdət Partiyasının isə üzvü olmayıb. Sadəcə olaraq Vəhdət Partiyası radikal müxalifətdə olduğu dövrlərdə bir müddət Ayaz Mütəllibova simpatiya bəsləyib və onu müdafiə edib.
Haqqındakı iddiaya münasibət bildirən ASDP sədri Araz Əlizadə VİP rəhbərindən bu cür qeyri-ciddi açıqlama gözləmədiyini deyib: "Əli Əliyevi bu günə kimi ciddi adam bilirdim. Bu cür çıxış etməsini ondan gözləmirdim. Əvvəla ondan başlayım ki, Tahir Kərimli Xalq Cəbhəsindən gəlib. Əli Əliyev də Xalq Cəbhəsinin yetirməsidir. Mən isə həmişə sosial-demokrat olmaqla yanaşı, Mütəllibova da müxalifətdə olmuşam. Burda bir məsələ var. Mütəllibov demokratiyaya gedən yolu tutmuşdu. Əli Əliyev isə üzv olduğu Xalq Cəbhəsi Partiyasından Vəhdət Partiyasına gedib. Düzü, belə mənasız fikirləri eşitmək mənə təəccüblü gəldi. Araz Əlizadə həmişə xalqın adamı olub, kimlərinsə adamı olmayıb”.
Vəhdət Partiyasının sədri Tahir Kərimli isə Əli Əliyevin parlamentdə təmsil oluna bilməməsi səbəbindən qarayaxma işlərlə məşğul olduğunu vurğulayıb: "Bu fikirlər cəfəngiyyatdır. Heç vaxt kiminsə adamı olmamışam. Əli Əliyevin bu cür çıxışı təhqir xarakteri daşıyır. Özü kiminsə adamı olub, mən yox. O, Milli Məclisə seçilmək, deputat olmaqdan ötrü həmişə dəridən-qabıqdan çıxıb. İstəyinə nail olmadığına görə qarayaxma işlərlə məşğuldur. Vaxtilə Ayaz Mütəllibovun yıxılmasında müstəsna rol oynayanlardan biri olmuşam. Təbii, o vaxt sovet imperiyasına qarşı mübarizə aparırdım, konkert Mütəllibova qarşı yox. Hər halda, o, həmin vaxt dövlət rəhbəri idi. İndi Əli Əliyev mənim adımı kiminsə adamı olmaqda necə çəkir?!”
İsmayıl
