Qonşu ölkələrdə "donuz qripi” (H1N1) virusunun yayılması Azərbaycanda narahatlığa səbəb olub. Ölkəmizdə bu virusa yoluxma halı qeydə alınmasa da, bu sahədə tədbirlər gücləndirilib.
Respublika Gigiyena və Epidemiologiya Mərkəzindən verilən məlumatda ölkəmizdə "donuz qripi”nə yoluxma olmadığı öz təsdiqini tapıb. Mərkəz bildirib ki, sərhəddən keçən bütün nəqliyyat vasitələri dezinfeksiya olunur və virusun yayıldığı ölkələrdən Azərbaycana gələn şəxslər tibbi müayinələrdən keçirilir: "Bu sahədə gündəlik nəzarət təmin edilir və qeydə alınan hadisələr barədə Səhiyyə Nazirliyinə müntəzəm məlumat verilir. Əgər hər hansı bir xəstəlik halı müəyyən olunarsa, həmin şəxslər qeydiyyata götürülür. Bu günə kimi heç bir xəstə aşkar edilməyib və sərhəd-keçid məntəqələrindən xəstəlik barədə məlumat daxil olmayıb”.
Qurum virusdan qorunmaq üçün insanlara tövsiyələrində xüsusilə həmin ölkələrdə yaşayan həmvətənlərimizə daha diqqətli olmağı məsləhət verib: "İnsanların kütləvi yığıldığı yerlərdən mümkün qədər kənar qalmaq lazımdır. Hər hansı bir xəstəylə yaxın təmas zamanı maskalardan istifadə etmək mütləqdir. Xəstələr müalicəyə cəlb olunmalıdır. Bir sözlə, hər bir kəs özünü qorumağı bacarmalıdır. Bildiyimiz kimi, xəstəliyin əsas göstəricisi yüksək temperaturdur və hərarəti qalxan şəxslər mütləq həkimə müraciət etməlidir. Xəstəliyin diaqnozu yalnız laborator müayinə nəticəsində qoyulur. Hər yüksək temperaturu olan şəxsə "donuz qripi” diaqnozu qoymaq olmaz. Mütləq laborator müayinələr aparılmalıdır”.
Qeyd edək ki, Dövlət Gömrük Komitəsinin sədri Aydın Əliyev də jurnalistlərin suallarını cavablandıran zaman Türkiyədə qeydə alınmış "donuz qripi” təhlükəsi ilə bağlı Azərbaycanın gömrük keçid-məntəqələrinin gücləndirilmiş iş rejiminə keçdiyini bildirmişdi. Komitə sədri onu da vurğulamışdı ki, yaxın zamanlarda nazirliyin təcrübəli həkimlərinin iştirakı ilə Komitənin tərkibində olan həkim briqadaları üçün seminar-treninqlərin keçirilməsi də nəzərdə tutulub.
Aysel Aslan
