"İqtidar-müxalifət dialoqu bu il də davam etdiriləcək”. Bu barədə hakim Yeni Azərbaycan Partiyasının (YAP) icra katibinin müavini, Milli Məclisin deputatı Siyavuş Novruzov neftin qiymətinin düşməsi və manatın məzənnəsinin dəyişməsinə münasibət bildirərək deyib.
YAP rəsmisinin sözlərinə görə, hazırda müxalifət partiyalarında ölkə başçısının fikirlərinə alternativ layihə təqdim etmək potensialı yoxdur: "Ancaq kiminsə layihəsi varsa, təbii ki, fikirlərini yazılı şəkildə təqdim edə bilər. Hər hansı siyasi partiya istənilən sahə üzrə təklif və layihələrini təqdim edə bilər. Əslində siyasi partiyaların funksiyası dövlətə alternativ təkliflərin verilməsindən ibarətdir. Bu baxımdan burada qəbahət yoxdur, təkliflər verilə bilər. Azərbaycanda iqtidar-müxalifət arasında dialoq var və bu proses davam etdiriləcək”.
YAP rəsmisinin açıqlamasına münasibət bildirən Klassik Xalq Cəbhəsi Partiyasının (KXCP) sədri Mirmahmud Mirəlioğlu "Şərq”ə deyib ki, hər kəsi düşündürən məsələlərlə bağlı təkliflər hazırlaya bilərik və hazırlayırıq da: "Biz təklif irəli sürmüşük və bir il öncə də belə bir təşəbbüs ortaya qoymuşuq. Görüşlər baş tutsa da, nəticəsi olmayıb. Doğrudur, dialoqun baş tutmasını istəyirik. Amma bu görüşün daha yüksək səviyyədə, burada parlamentarinin, mütəxəssislərin iştirak etməsini istəyirik”.
Təşkilat sədri diqqətə çatdırıb ki, dünən (13 yanvar) bu məsələlərlə bağlı iki təklif veriblər: "Birinci təklifdə bildirdik ki, yürüdülən siyasətin nəticəsi olaraq yaranmış böhranlı vəziyyəti müzakirə etmək üçün bütün siyasi təşkilatların bir arada olmasını istəyirik. İkinci təklifimiz də o oldu ki, hökumətdən təklif deyil, əməli iş gözləyirik”.
Ayyət Əhməd
