Ombudsman Aparatının mətbuat xidmətinin rəhbəri, tanınmış yazıçı-jurnalist Zemfira Məhərrəmli öz ərizəsi ilə vəzifəsindən azad edilib. "Şərq”ə açıqlamasında təqaüd yaşına görə istefa verdiyini təsdiqləyən Zemfira xanım bu yaxınlarda 60 yaşının tamam olduğunu deyib:
"Ötən ilin dekabrında 60 yaşım tamam oldu. İşdən uzaqlaşmağım da məhz yaşa görə təqaüdə çıxmağımla bağlıdır. Yəni öz xahişim və istəyimlə Ombudsman Aparatının mətbuat xidməti vəzifəsindən azad olunmuşam”.
60 illik ömrünün 40 ilə qədərini sevdiyi, rəğbət bəslədiyi jurnalistikamıza həsr etdiyini deyən Zemfira xanım jurnalistikada hər zaman var olacağını qeyd edib: "Mətbuat xidməti vəzifəsindən azad olunmağım o demək deyil ki, jurnalistikadan da gedirəm. Xeyr, jurnalist olaraq öz fəaliyyətimi davam etdirəcəm. Bu mənə uzun illik səmərəli jurnalistlik fəaliyyətimi davam etdirmək, bədii-publisistik yaradıcılığa daha çox vaxt ayırmaq imkanı verəcək. Həyat və yaradıcılıq davam edir”.
Qeyd edək ki, Z.Məhərrəmli, ustad jurnalist Nəsir İmanquliyevin yaratdığı, yaşatdığı uzun ömürlü "Bakı” və "Baku” qəzetlərində elm-təhsil mədəniyyət şöbəsinin müdiri olub. 25 illik fəaliyyətindən sonra Ombudsman Aparatının mətbuat xidməti vəzifəsinə dəvət olunub və məhz bu dəvətlə də 13 il sözügedən qurumda mətbuat katibi vəzifəsini icra edib. 2003-cü ilin aprelindən Azərbaycan Respublikası İnsan Hüquqları üzrə Müvəkkili (Ombudsman) Aparatının mətbuat xidmətinin rəhbəri vəzifəsində çalışdığını deyən Z.Məhərrəmli Aparatdan xoş xatirələrlə ayrıldığını deyib: "Hər zaman öz işimi sevmişəm, bütün kollektivə dəyər vermişəm. Bütün bunlarla yanaşı, bu dövlət qurumunda, ilk günlərdən qurucusu və təəssübkeşi olduğumuz təsisatdakı gözəl kollektivdə xeyli müddət çalışmağımdan, ölkəmizin ilk Ombudsmanının
İctimaiyyətlə, KİV-lə əməkdaşlığını qurduğumdan məmnunam. Fəaliyyətimin bu mərhələsi də mənim üçün çox önəmli və dəyərli olub. Ömrümün 13 ilinin bu cür qurumda keçməsi, insan hüquqlarının müdafiəsində müəyyən qədər əməyimin olması ilə ancaq fəxr edə bilərəm”.
Şəymən
