"Azərbaycanda bəzi partiyalar fəaliyyət göstərmək əvəzinə alqı-satqı obyektinə çevrilib. Bəzilərinin isə hüquqi mənsubiyyəti üzərində mübahisə yaranıb, partiyanın kimə aid olması bəlli deyil. Bunlara son qoymaq üçün qanunvericilikdə dəyişiklik etməyə, məsələlərin hüquqi bazasını konkretləşdirməyə qərar vermişik”.
Bu barədə Milli Məclisin İctimai birliklər və dini qurumlar komitəsinin sədri, Yeni Azərbaycan Partiyasının icra katibinin müavini Siyavuş Novruzov bildirib. Onun sözlərinə görə, "Siyasi partiyalar haqqında” qanuna və bundan irəli gələrək digər qanunvericiliyə dəyişikliklərin edilməsinin müzakirəyə çıxarılması nəzərdə tutulub: "Bununla bağlı dünya təcrübəsi əsas götürüləcək. Məsələn, dünya təcrübəsində də var ki, partiya yaranandan sonra iki ildə heç bir siyasi prosesdə iştirak etmirsə, avtomatik bağlanır. Yeni hüquqi baza yaradarkən bunları nəzərə alacağıq. Bizdə bəzi partiyalar funksiyalarını yerinə yetirmir, alqı-satqı bazasına çevrilir. 90-cı illərdə Azərbaycanda qeydiyyatdan keçmiş siyasi partiyanı sonradan kimsə alır, kimsə nəsə edir. Bir sıra partiyalarda artıq məhkəmə çəkişmələri başlayıb. Bir tərəf deyir ki, partiyanın adı, möhürü mənə aiddir, digər tərəf isə ona aid olduğunu iddia edir. Biz bütün bunların hamısını qanunla tənzimləməliyik”. Bu problemlərin hazırda AXCP və Müsavat Partiyalarında olduğunu deyən S.Novruzov bildirib ki, yeni dəyişiklik bu məsələləri həll edəcək, mübahisələrə son qoyacaq.
YAP funksionerinin açıqlamasına münasibət bildirən Vətəndaş və İnkişaf Partiyasının sədri (VİP) Əli Əliyev "Şərq”ə söyləyib ki, siyasi partiya adına iddialı olan tərəflər ölkənin siyasi həyatında mütəmadi iştirak etməlidirlər: "Onların fəaliyyəti ən azı mətbuat səviyyəsində görünməlidir. Ölkə miqyaslı seçkilərə qatılmalıdırlar. Belə fəaliyyəti olmayan siyasi təşkilatların ortada qalması statistik xarakter daşıyır. YAP bu "təmizləmə” prosesi opponentlərinə qarşı aparmaq niyyəti güdmürsə, S.Novruzovun fikirlərini normal qarşılamaq olar. Yox, əgər bu həqiqətən hakkimiyyətin xeyrinə çıxış etməyən təşkilatların aradan qaldırılmasına yönəlibsə, təşəbbüsü dəstəkləmirik. Çünki bu çox ziyanlı sonluğa gətirib çıxarar”.
Müsavat Partiyasının sədr müavini Gülağa Aslanlı isə qeyd edib ki, siyasi təşkilatarı inzibati metodlarla tənzimləmək doğru addım deyil.
Ayyət Əhməd
