"Anti-Azərbaycan qüvvələr Mehman hadisəsi ətrafında ajiotaj yaradaraq ölkəmizə qarşı istifadə etməyə cəhd edirdilər. Bu baxımdan Prezident çox humanist addım atdı və bunu təqdir etmək lazımdır”.
Bunu "Sherg.az”a açıqlamasında "Səs” Media Holdinqin rəhbəri Bəhruz Quliyev deyib.
Baş redaktorun sözlərinə görə, dövlət başçısının addımı ilə prosesi əlində bayraq edərək ajiotaj yaratmaq istəyənlər, Azərbaycan əleyhinə kampaniya aparmaq istəyən qüvvələrin cəhdləri boşa çıxdı:
"Onlar Mehmanı siyasi oyun predmetinə çevirmək istəyirdilər. Lakin hamısının məkirli planları boşa çıxdı və bir daha vurğulandı ki, Azərbaycanda baş verən bütün hadisələri, mövcud problemləri ancaq və ancaq özümüz həll edirik. Fransada, Yunanıstanda və Avropanın digər ölkələrində insanların haqqları kütləvi şəkildə pozulur.
Ancaq onlara səs çıxarmayan Avropa Parlamenti Azərbaycanda bir məhkumun taleyinə "biganə” qalmır. Hələ əlüstü bir qətnamə də çıxardır. Sözsüz ki, heç bir qurumun Azərbaycanın daxili işinə qarışmağa haqqı yoxdur. Azərbaycan Prezidenti bütün dövrlərdə humanist prinsiplərə əsaslanaraq addımlar atıb”.
B.Quliyevin sözlərinə görə, indiki qərar da təkcə Mehman Hüseynovla bağlı deyil. Ümumiyyətlə, cənab Prezidentin apardığı siyasətin mərkəzində vətəndaş amili dayanır.
Ona görə də siyasi mövqeyindən asılı olmayaraq, sadə vətəndaş kimi M.Hüseynovun müraciətinə baxıldı. Cənab Prezidentin müdaxiləsi məsələnin daha obyektiv araşdırılmasına səbəb oldu.
Dövlət başçısı hər zaman qeyd edib ki, siyasi mənsubiyyətindən asılı olmayaraq, o hər bir Azərbaycan vətəndaşının prezidentidir. Bu addımın kökündə də məhz bu addım dayanır. Yoxsa kiminsə hansısa formada qətnamə qəbul etməsi, bununla bizim daxili işlərimizə qarışması, müdaxiləsi mümkün deyil”.
İsmayıl
