Milli Məclisdə büdcə müzakirələri zamanı Mədəniyyət komitəsinin sədri Rafael Hüseynov mədəniyyət sahəsinə maliyyə vəsaitinin artırılmasını tələb edib.
Sherg.az-ın xəbərinə görə, o deyib ki, Azərbaycan cəmiyyətində asayişi təkcə Daxili İşlər Nazirliyi təmin və bərqərar etmir:
"Əgər biz insanların asudə yaşamasını istəyiriksə, mədəniyyətli olmalıyıq. Çünki mədəniyyətin içi bilik, zəka ilə doludur. Ona görə də bu sahəyə diqqət artmalıdır. Mədəniyyət sahəsi ən azı büdcənin iki faizini təşkil etməlidir".
Deputat kino sahəsinə vəsaitin artırılmasını istəyib:
"1,5 milyonla kinonu irəli aparmaq mümkün deyil. Kino yalnız insanlara nəyisə göstərmək deyil. Bizdə dublyaj sənəti var. Dublyaj sənəti dilimizə böyük töhfələr verə bilər. Bunların keyfiyyətli olması üçün maliyyə yetərincə olmalıdır. Mən xahiş edirəm ki, mədəniyyət sahəsinə vəsait artırılsın”.
Anar
