"Azərbaycanın istəyi budur ki, Türkiyə ATƏT-in həmsədr ölkələri sırasında yer alsın. Amma çox təəssüf ki, bu real deyil”.
Bu sözləri "Atlas” Araşdırmalar Mərkəzinin rəhbəri, politoloq Elxan Şahinoğlu "Dağlıq Qarabağ münaqişəsinin nizamlanması baxımından 2015-ci ilin yekunlarına və 2016 -cı ildəki perspektivlər” mövzusunda keçirdiyi mətbuat konfransında deyib. Ekspertin sözlərinə görə, Ankaranın həmsədrlikdə təmsil olunmasını, nəinki Ermənistan, heç böyük dövlətlər də istəmir: "Rusiya, Fransa və ABŞ da Türkiyənin əleyhinədir. Həm də, Rusiya ilə Türkiyə, Türkiyə ilə Avropa Birliyi arasında gərginlik yaşandığı bir dönəmdə qardaş ölkənin həmsədrlikdə təmsil olunması inandırıcı deyil”.
Almaniyanın həmsədrlikdə təmsilçiliyinə gəlincə, ekspert söyləyib ki, bu ölkə də həmsədr olsaydı, Azərbaycanın ərazi bütövlüyünü dəstəkləməzdi: "Ermənistana təzyiqlər olmayana qədər separatçı ölkə münaqişənin həllində maraqlı olmayacaq. Ona görə də məsələni güc yolu ilə həll etmək lazım gələcək”.
Ayyət Əhməd
