Daxili İşlər Nazirliyinə istinadən aldığımız məlumata görə, yanvarın 15-də Quba rayonunda fəaliyyət göstərən "Retro” istirahət mərkəzində meyiti tapılan 35 yaşlı Könül Zalova şəhər sakini, 1982-ci il təvəllüdlü Elməddin Əhmədov tərəfindən qətlə yetirilib.
İlkin araşdırma nəticəsində məlum olub ki, qeyri-sağlam həyat tərzi sürən K.Zalova 1995-ci ildə Bakı Dövlət Universitetinin jurnalistika fakültəsini bitirib. Məlumata görə, naməlum qadını meyitinin aşkarlanması faktı ilə bağlı rayon prokurorluğunda Cinayət Məcəlləsinin 120.1-ci maddəsi ilə cinayət işi başlanıb, dərhal hadisə yerinə baxış keçirilməklə müvafiq ekspertizalar təyin edilib. Könülün sevgilisi olduğu iddia edilən Elməddin Əhmədovla qısqanclıq zəminində mübahisə etdiyi və nəticədə içkili olan Elməddinin Könülü öldürdüyü ehtimal olunur. Belə ki, K.Zalova E.Əhmədovla birgə istirahət etmək üçün yanvarın 13-də Quba rayonu Qəçrəş yaşayış massivində fəaliyyət göstərən "Retro” ailəvi istirahət mərkəzinə gediblər. Onlar gecəni bir yerdə keçiriblər. Yanvarın 14-də E.Əhmədovla K.Zalova arasında mübahisə düşüb. Aralarında yaranmış mübahisə zəminində E.Əhmədov K.Zalovanı boğaraq öldürüb. Daha sonra isə K. Zalovanın "İnfiniti FX 35” markalı, 10 OD 999 dövlət nömrə nişanlı avtomobilini və mobil telefonunu götürərək hadisə yerindən qaçıb. Həyata keçirilən tədbirlər nəticəsində E.Əhmədov tutularaq istintaqa təhvil verilib. Faktla bağlı Quba Rayon Prokurorluğu tərəfindən Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, istintaq tədbirləri davam etdirilir.
Qeyd edək ki, öldürülən qadının tanınmış meyxanaçı Sadıqla dostluq münasibəti olub. Onun meyxanaçı ilə birgə fotosu da üzə çıxıb. Könülün bir azyaşlı övladının olduğu da deyilir.
Şəymən
