"2015-ci ildə Dağlıq Qarabağda dinc sakinlər arasında çoxlu sayda ölüm və yaralanma halları ilə nəticələnən silahlı insidentlərin çoxalmasının şahidi olduq”. Məlumata görə, bunu Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirdiyi brifinqdə bildirib. Onun sözlərinə görə, vəziyyət ciddi narahatlıq doğurur: "Prosesin sürətləndirilməsinin vacibliyindən çıxış edərək atəşkəs rejiminin bərqərar olması üçün tərəfləri danışıqları aktivləşdirməyə çağırırıq”.
XİN rəsmisinin çağırışını şərh edən "Atlas” Araşdırmalar Mərkəzinin sədri Elxan Şahinoğlu deyib ki, Rusiya hakimiyyət dairələri hələ də münaqişənin həllində və qaçqınların geri dönməsində, işğal edilmiş rayonların geri qaytarılmasında maraqlı deyil. Ekspertin sözlərinə görə, həmsədrlər də münaqişənin həllində acizdirlər və heç bir ideyaları yoxdur: "Yeganə məramları odur ki, prezidentləri görüşdürsünlər. Amma bununla da problem həll olunmur. Çünki məzmunsuz görüş əlavə problemlər yaradır. Həm də Azərbaycan dövlət başçısı dəfələrlə vurğulayıb ki, görüntü xatirinə bu görüşlərə qatılmayacaq.
Həmsədrlərin münaqişənin həllində faktiki rol oynaya bilmədiklərini qeyd edən politoloq deyir ki, onlar Dağlıq Qarabağ ətrafındakı rayonların boşaldılması üçün Ermənistana təzyiq etməlidir: "Guya münaqişənin həlli ilə ATƏT məşğuldur və elə qətnamə qəbulu zamanı onlarla məsləhətləşmək lazımdır. Amma niyəsi aydın deyil”. E.Şahinoğlu hesab edir ki, bu cür açıqlamalar əslində Ermənistanın mövqeyinin dəstəklənməsi, Dağlıq Qarabağla bağlı status-kvonun davamı deməkdir: "Biz isə status-kvonun dəyişməsini istəyirik”.
Ayyət Əhməd
