"Azərbaycan Dəmir Yolları” Qapalı Səhmdar Cəmiyyətinin mətbuat katibliyinin rəisi Nadir Əzməmmədovun sözlərinə görə, dəmir yolu nəqliyyatı insanların kütləvi istifadə etdiyi nəqliyyat növü olduğundan sanitariya işləri burada daha intensiv aparılır:
"Son günlər Azərbaycan Respublikası ilə həmsərhəd olan ölkələrdə "donuz qripi”nin (A/H1N1 virusunun) aşkarlanması ilə əlaqədar ölkəmizdə bu virusa qarşı profilaktik tədbirlər aparılır. Bununla bağlı "Azərbaycan Dəmir Yolları”nın Həkim-Sanitar Xidməti tərəfindən Tədbirlər Proqramı hazırlanıb, qabaqlayıcı tədbirlər görülür.
Tədbirlər Proqramına əsasən, sərnişin qatarlarında, uşaq-yeniyetmə, tədris və tibb müəssisələrində, qaçqın və məcburi köçkünlərin sıx məskunlaşdığı yerlərdə sanitariya-gigiyena norma və qaydalarına, dezinfeksiya rejiminə ciddi əməl edilməsi yoxlanılır. Dəmir yolu ərazisində yerləşən bütün obyektlərin profilaktik və cari dezinfeksiyası aparılır.
Bundan başqa, şübhəli xəstələrin müvəqqəti saxlanması üçün xüsusi palatalar ayrılıb, tibbi personalın fərdi qoruyucu vasitələrlə təmin edilməsi həyata keçirilir, dəmir yolu ərazisində "donuz qripi” xəstəliyinə qarşı profilaktik və əks-epidemik tədbirlərin həyata keçirilməsi məqsədi ilə dərman və vaksinlərin, dezinfeksiyaedici preparatların, fərdi qoruyucu vasitələrin ehtiyatı yaradılır”. N.Əzməmmədovun sözlərinə görə, artıq ölkədaxili hərəkət edən qatarlarda lazımi tədbirlər görülüb: "Həmçinin sərhəd-keçid məntəqələri gücləndirilmiş rejimə keçib. Sərnişin qatarlarında çalışan briqadalar arasında yolboyu A (H1N1) virusunun yoluxduğu şübhəli bilinən xəstələr olduqda hansı tədbirlərin görülməsi barədə təlimatlar aparılır. Yoluxucu xəstəliklərin profilaktikasında şəxsi gigiyenanın gözlənilməsinin vacibliyi barədə sərnişinlər və dəmiryolçular arasında maarifləndirmə işi, qatar heyətlərinin tibbi-sanitar biliklərinin artırılması istiqamətində işlər gücləndirilib. Şübhəli xəstələr barədə məlumatlar dərhal Həkim-Sanitar Xidmətinə təqdim olunacaq. Sərnişin qatarlarının epidemiya əleyhinə hazırlığın vəziyyəti nəzarətdə saxlanılır.
"Azərbaycan Dəmir Yolları” QSC-nin Sanitar-Karantin Müfəttişliyində "Qaynar xətt” yaradılıb. Sərnişin qatarlarında, vağzallarda, sərhəd-keçid məntəqələrində şübhəli hallar barəsində dərhal "qaynar xətt”ə məlumatlar daxil olacaq”.
Azərbaycan Tibb Universitetinin Yoluxucu xəstəliklər kafedrasının assistenti, infeksionist Vüqar Cavadzadə A seroqrupa daxil olan H1N1 virusunun hava-damcı yolu ilə yayıldığını deyib: "Yəni bu virus əsasən asqırma, öskürmə zamanı bir şəxsdən digər şəxsə yoluxur. Bu halda viruslar digər şəxsin burun boşluğuna, yaxud da gözünə düşərsə, yoluxma baş verə bilər. Yoluxmadan təqribən 3-5 gün sonra isə xəstəliyin ilkin əlamətləri başlayır. Yoluxdurma dövrü 7-8 gün davam edir. Xəstəliyin ağır forması 8-9 gün davam edə bilər”.
V.Cavadzadənin sözlərinə görə, "donuz qripi”nə yoluxma zamanı ilkin olaraq hərarət, quru öskürək, başda və əzələlərdə ağrıların olması, ümumi zəiflik, ürəkbulanma, qusma, bəzi hallarda ishal da müşahidə edilə bilər, ancaq ishal çox az hallarda müşahidə edilir. Xəstəliyin ağır hallarında pnevmaniya, el arasında deyildiyi kimi, sətəlcəm inkişaf edir, bu da kəskin ağciyər çatışmazlığı ilə nəticələnir.
İnsanların çox toplaşdığı yerlərin xəstəliyə yoluxma baxımından daha riskli olduğunu qeyd edən həkim-infeksionist H1N1 virusundan qorunmaq üçün əhaliyə çağırış da edib: "Qorunmaq üçün əsasən gigiyenik qaydalara əməl etmək lazımdır. Yəni əllər hər zaman təmiz olmalı, tez-tez yuyulmalıdır. Xəstəlik şübhəsi olan şəxslərdən müəyyən qədər uzaq durmaq lazımdır. Bundan başqa, bədən müqavimətini artıran dərman preparatları, yəni vitaminlər qəbul etmək lazımdır. "Donuz qripi” üçün son illər tətbiq edilən virus əleyhinə dərman preparatlarının istifadəsi məqsədəuyğun olardı”.
Şəymən
