"Azərbaycan Dövlət İqtisad Universitetində (ADİU) yaşlı dosentlər işdən çıxarılacaq”. Bu barədə ali məktəbin rektoru Ədalət Muradov deyib. Onun sözlərinə görə, universitetdə 917 nəfər müəllim çalışır və bu rəqəm çoxdur: "Yaşı 70-dən yuxarı, elmi dərəcəsi olmayan, habelə yaşı 75-dən yuxarı dosentlərin işdən çıxarılması nəzərdə tutulur. Yalnız professorlar istədikləri qədər universitetdə çalışa biləcəklər”.
Rektor əlavə edib ki, rəsmi rəqəmlərə görə, universitetin məzunlarının 38 faizi 1 ay müddətində işlə təmin olunub. Ə.Muradovun addımını şərh edən Azərbaycan Avropa Hərəkatının prezidenti Ramin Hacılı "Şərq”ə bildirib ki, bunun üçün öncə gənc kadrlar hazırlanmalıdır. Çünki gənc kadrlar hazırlanmasa, yaşlı kadrların işdən uzaqlaşdırılması boşluq yaradacaq: "Bizdə belə bir tendensiya var. Əvvəlcə dovşanın qulağını kəsirlər. Sonra da baxırlar ki, dovşan elə tək qulaq imiş. Yəni əvvəlcədən tədbirli davranmaq lazımdır. Bu yaxınlarda mediadan oxuyuram ki, Nəqliyyat Departamenti ləğv olunur. Amma onun yerinə hansısa bir prosedur hazırlanmayıb. Bu baxımdan düşünürəm ki, öncə kadrlar hazırlanmalı, sonra yaşlı kadrlar işdən uzaqlaşdırılmalıdır. Təəssüf ki, bu illər ərzində gənc kadrların hazırlanması ilə bağlı dövlət heç bir iş görmədi. Neftdən gələn gəlirlərimiz təhsil inkişafı istiqamətinə yönəlmədi və sonda belə nəticənin, mənzərənin şahidi olduq”.
Həmsöhbətimiz söyləyib ki, kadrların gəncləşdirilməsi zəruridir: "45 yaşından yuxarı yaşı olan kadrlar daha çox köməkçi funksiyanı yerinə yetirməlidirlər. Amma birbaşa təhsil prosesində onların tədris həyata keçirməsi məqsədəuyğun hesab olunmur. Bu, aydın məsələdir. Amma onları çıxarıb yerini boş saxlamaq olmaz. Bunun üçün də sistemli iş qurulmalıdır. Düşünürəm ki, dövlət təhsil islahatlarını gerçəkləşdirərkən çox diqqətli olmalıdır. Yenə də ehtiyatlı davranılmalıdır. Ona görə ki, təhsil hər bir ölkənin onurğa sütunu rolunu oynayır. Məxsusi olaraq, bu, kiçik dövlətlərdə aydınca görünür”.
Ayyət Əhməd
