Əməkdar artist Elnarə Abdullayevanın səsinin batdığı xəbəri sənətçinin pərəstişkarlarını narahat edib. Hətta xanəndənin səhnədən birdəfəlik getdiyi də bildirilib. Söz-söhbətlərə görə, həkimlər onun bir daha oxuya bilməyəcəyini deyiblər. Bir verilişin anonsu isə narahatlığı bir qədər də gərginləşdirib.
Xatırladaq ki, illər öncə evində baş verən faciə nəticəsində Əməkdar artistin gözləri və səsi tutulubmuş. Xanəndənin növbəti dəfə də səsində belə bir problemlə üzləşməsi onu sevənlərin, mətbuatın da diqqətindən kənarda qalmayıb. Elnarə Abdullayevanın özü ilə əlaqə yaradıb səhhəti ilə maraqlandıq: "Şərq”ə açıqlama verən xanəndə "A bacı, inan ki, iki gündür telefonlarımız susmur. Hamı zəng vurub soruşur ki, sənə nə olub? Səsin niyə batıb? Hətta toyuna hazırlaşdığım toy sahibləri də narahat olmağa başlayıb, zəng vururlar ki, Elnarə xanıma deyirlər toya gedə bilməzsiz. Məni sevən insanlar, mənim yaxınlarım, rayonda yaşayan qohumlarım da narahat olublar. Zəng vururlar. Toy sahibələrini də başa düşürəm ki, müğənni ilə əvvəldən danışıblar,
beh veriblər. Maraqlanırlar ki, oxuya biləcəm, ya yox. Mən mətbuat nümayəndələrinə, efirə hər zaman hörmətlə yanaşmışam. Başa düşürəm ki, maraq yaratmaq üçün bu kimi xəbərlərə, verilişlərin anonslarına ehtiyac olur. Amma məni də, məni sevən insanları da nəzərə alsalar, yaxşı olar. Verilişin anonsuna baxanda özüm da çaşdım. Yəni sizin qəzet vasitəsilə fürsət tapıb məni sevən, mənim üçün narahat olanlara bildirirəm ki, şükür, səsim yerindədir. Səhhətim də normaldı. Düzdü, bu xəbərə sevinənlər də oldu yəqin, amma səsimin batmasını gözləyənlər, bu qədər sevinməyin. Şükür Allaha, səsim yerindədir” söylədi.
Tahirə
