Türkiyənin Azərbaycandakı səfirliyi Türkiyənin Azərbaycan vətəndaşlarına viza rejimi tətbiq edəcəyi ilə bağlı xəbərlərə münasibət bildirib.
Səfirliyin mətbuat xidməti tərəfindən yayılan bəyanatda deyilib ki, Türkiyənin Azərbaycan vətəndaşlarına viza rejimi tətbiq edəcəyi ilə bağlı xəbərlər həqiqəti əks etdirmir. Belə ki, iki ölkə arasında hazırda mövcud olan gediş-gəliş rejiminə hər hansı dəyişiklik edilməsi nəzərdə
tutulmur. 2007-ci ildən bəri Azərbaycan vətəndaşları ölkəmizə turizm məqsədli səfərləri zamanı 30 gün müddətində Türkiyədə vizasız qalmaq hüququna malikdir.
Xatırladaq ki, ötən gün Türkiyə KİV-i 89 ölkəyə, o cümlədən Azərbaycana 2016-cı ilin iyunundan viza tətbiq ediləcəyi haqda xəbər yayıb.
Heç bir əsas olmadığı halda qardaş ölkənin Azərbaycan vətəndaşlarına viza rejimi tətbiq edəcəyinə dair məlumatların gündəmə gətirilməsini şərh edən edən politoloq Qabil Hüseynlinin sözlərinə görə, viza məsələsinin müzakirə predmetinə çevrilməsi Avropa Birliyinin Türkiyəyə Şengen zonasına və AB-nin əhatə etdiyi ölkələrə vizasız gediş-gəliş tətbiq etmək istəyi ilə bağlıdır: "Bilirsiniz ki, Avropa İttifaqının Türkiyə vətəndaşları üçün vizasız giriş təmini məsələsi xeyli zamandır gündəmdədir. Əgər müvafiq razılaşmalar əldə olunarsa, iyun ayından Türkiyə vətəndaşlarının Avropaya vizasız gediş-gəlişinin reallaşma ehtimalı var. Türkiyə vətəndaşlarının Avropa Birliyinə daxil olan ölkələrə vizasız gediş-gəlişinə icazə verilməsi qarşılığında isə Avropa İttifaqı Türkiyə qarşısında tələb qoyub ki, Türkiyə vizasız gediş-gəlişi olan ölkələrə qarşı viza rejimi tətbiq etməlidir. Amma burada Türkiyənin seçim haqqı da var. O, bir-iki dövlətə güzəştə gedə bilər ki, bu sırada Azərbaycan birinci gəlir”.
Politoloqun sözlərinə görə, bütün bunlara rəğmən Türkiyənin Azərbaycan vətəndaşlarına viza rejimi tətbiq edəcəyinə dair söz-söhbətlərin bu cür qabardılması təsadüfi deyil. Görünür, ortada müəyyən maraqlar var.
Şəymən
