"Rusiyanın gömrükdə saxlatdığı məhsulların Qazaxıstan, Qırğızıstan və Tacikistana çatması üçün qardaş ölkə Azərbaycan qapılarını açdı.". Bu barədə Türkiyə mediasında xəbərlər yayıldı. Türkiyəyə aid yük maşınları Azərbaycan, Xəzər dənizi və Türkmənistan dəhlizindən istifadə edəcək. Məsafə olaraq daha qısa yol olan Xəzər vasitəsi ilə məhsulların daşınmasının bundan sonra daimi olacağı da gündəmdədir.
Moskva tərəfindən maneə törədildiyinə görə, indiyə qədər Orta Asiya respublikalarına Rusiyadan keçməklə gedən Türkiyəyə məxsus yük maşınları bundan sonra Azərbaycandan keçməklə mənzil başına çatacaqlar.
Xarici işlər nazirliyinin Beynəlxalq Nəqliyyatçılar Dərnəyinin (UND) məlumatına görə, Rusiya üzərindən Qazaxıstan, Qırğızıstan və Tacikistana getmək istəyən Türkiyə nömrəli maşınlar, Xəzər dəhlizindən istifadə edəcək. Təyyarə vurulma hadisəsindən sonra rəsmi Moskvanın yaratdığı maneə səbəbiylə Türkiyəyə məxsus TIR-lar günlərdir Gürcüstandan Rusiyaya keçə bilmirdi.
"Yeni Şafaq"ın xəbərinə görə, xarici işlər naziri Mövlut Çavuşoğlu Azərbaycandakı təmasları zamanı daşınmalarla əlaqədar mövcud vəziyyəti həmkarı Elmar Məmmədyarovun diqqətinə çatdırıb. Nazir Məmmədyarov da durumla bağlı Azərbaycan prezidenti İlham Əliyevi məlumatlandırıb. Xahişi müsbət qarşılayan İlham Əliyevin Türkiyə tərəfinə hər cür köməkliyin göstərilməsi ilə bağlı təlimat verdiyi bildirilir.
Beynəlxalq Nəqliyyatçılar Dərnəyinin rəhbəri Fateh Şener, yüksək xərclər olduğuna görə indiyə qədər Xəzər yolundan çox da istifadə edilmədiyini söylədi. İ.Əliyevin təlimatını xatırladan Şener, "Tam da bu yolun asanlaşmasını gözlədiyimiz bir dövrdə Rusiya böhranı yaşandı və Azərbaycan ziyana düşən avtomobillərimizə sahib çıxdı" deyə bildirib.
Bu qərarı verən prezident İlham Əliyevə təşəkkür edən UND başçısı Şener, "Orta Asiya, Qafqazı və Türkiyəni bir-birinə bağlayacaq bu yolun daimi olmasını istəyirik" deyə arzuzunu dilə gətirib.
