Respublikanın ən böyük müəllim-şagird kontingentinə sahib məktəblərdən olan Yasamal rayonundakı 20 saylı məktəb-liseydə təmir-tikinti işləri aparılır. Təhsil Nazirliyinin müraciətinə əsasən həmin məktəbin yerində müasir tələblərə cavab verən məktəb kompleksi inşa olunur.
Nazirliyin məlumatına görə, bu tədris ocağında 111 sinifdə 2830 şagird təhsil alır. Əvvəlki dövrlərdə isə məktəb-liseydə 3200 nəfərədək şagird oxuyub. Məktəbdə çalışan 289 müəllimdən 5-i əməkdar müəllim, 5-i ilin müəllimi, 3-ü elmlər namizədidir.
Bu məktəb-lisey Bakı şəhərinin əhalinin ən sıx məskunlaşdığı ərazisində yerləşdiyinə görə təhsil müəssisəsinin yeni tikilən binasının müasir tələblərə uyğun inşa olunması nəzərdə tutulub. Məktəbin həyətindəki idman zalı, istilik qazanxanası sökülüb. Azərbaycanın milli arxitekturasına uyğun inşa ediləcək olan məktəbin kommunikasiya və sinif otaqları, kabinetləri müasir dövrün tələblərinə uyğun üslubda istifadəyə veriləcək. 3000 şagird yerlik layihələndirilmiş və 25000 kvadratmetr sahəsi olacaq yeni məktəbin 2016-2017-cı tədris ili üçün istifadəyə verilməsi planlaşdırılır.
Təhsil ocağında təmir işlərinin aparılmasını təqdirəlayiq hesab edən məktəb rəhbərliyi bütün şagird və müəllimlərin, həmçinin valideynlərin yeni məktəbin istifadəyə verilməsini səbirsizliklə gözlədiklərini bildirib. 20 saylı məktəb-liseyin bu ilin sentyabrında hazır olacağı bildirilir. Rəhbərliyin məlumatına görə, təmir müddətində məktəbin ibtidai siniflərində təhsil alan 1450 şagirdi 175 saylı məktəbə, yuxarı siniflərdə təhsil alanlar isə metronun "Gənclik” stansiyasının yaxınlığındakı 325 saylı məktəbə köçürülüb. Hazırda onların təhsil prosesi tam qaydasında davam etdirilir.
Aysel Aslan
