Azərbaycan banklarının filial və şöbələrindən kənardakı valyutadəyişmə məntəqələri bağlanılıb. Bununla bağlı banklara Azərbaycan Mərkəzi Bankından göstəriş verilib.
Göstərişə uyğun olaraq "Zaminbank”, "Atrabank”, "TuranBank” və "Yunayted Kredit Bank” kimi valyuta bazarında aparıcı mövqeyə malik bir sıra banklar öz "exchange”lərinin bağlanmasına qərar veriblər. "Zaminbank”ın Müşahidə Şurasının sədri Nadir İsmayılov bildirib ki, valyutadəyişmə məntəqələri rentabelli olmadığı üçün onların bağlanması qərarı alınıb: "Çoxsaylı valyutadəyişmə məntəqələrinin fəaliyyətinin davam etdirilməsini məqsədəuyğun hesab etmədik. Bundan sonra valyuta mübadiləsi yalnız bankın filial və şöbələrində aparılacaq”. Bir sıra ekspertlərə görə, valyutadəyişmə məntəqələrinin bağlanması pul mübadiləsi əməliyyatında qara bazarın genişlənməsinə və əhali arasında narazılığın yaranmasına səbəb olacaq. Amma bunun əksini düşünənlər də az deyil. Milli Məclisin İqtisadi siyasət, sənaye və sahibkarlıq Komitəsinin üzvü Vahid Əhmədov "Şərq”ə verdiyi açıqlamada valyutadəyişmə məntəqələrinin bağlanmasının qaçılmaz olduğunu və bunun hər hansı problem yaratmadığını deyib: "Məntəqələrin bağlanması zəruri addım idi. Onsuz da gec-tez belə qərar verilməliydi. Bu proses qara bazarın genişlənməsinə yox, əksinə, sıradan çıxmasına təsir göstərəcək. Çünki qara bazarı məhz elə həmin valyutadəyişmə məntəqələri yaradırdı. Ölkədə qeydiyyatdan keçməyən nə qədər puldəyişmə məntəqələri var idi. Onların qanunsuz fəaliyyətinə yol vermək olmaz. Kifayət qədər valyuta var və bundan sonra pul mübadiləsi ayrı-ayrı yerlərdə deyil, bankların nəzdində həyata keçiriləcək. Əhali də yavaş-yavaş buna öyrəşəcək”. İqtisadçı deputat bildirib ki, valyutadəyişmə məntəqələrinin ləğvi insanların xeyrinədir: "Əslində bu, müvəqqəti haldır. Zaman-zaman belə islahatlara gedilməlidir. Məntəqələrin azalması əhaliyə heç bir problem yaratmayacaq. Pul mübadiləsi etmək istəyən vətəndaşlar banklara gedərək əllərindəki valyutanı dəyişəcəklər. Ola bilsin, əhalinin sıx olduğu yerlərdə, məsələn, aeroportlarda, vağzallarda, marketlərdə banklardan əlavə valyutadəyişmə məntəqələri saxlanılsın. Bunu təşkil etməklə bir qrup insanın narazılığını aradan qaldırmaq mümkündür”.
İsmayıl
