Azərbaycan muğamının canlı karifeyi, Xalq artisti Əlibaba Məmmədovun səhhəti pisləşib.
Bu barədə Xalq artisti özü məlumat verib. O bildirib ki, səhhətindəki problemlərə görə bir aydır evdən bayıra çıxa bilmir. Xanəndə ilə əlaqə yaradıb halsızlığının səbəbini soruşduq. "Şərq”ə açıqlama verən Əlibaba Məmmədov "Bir az özümü narahat hiss edirəm. Evdəyəm. Uzanmışam. Mərkəzi Klinik Xəstəxanasına getmişdim. Dedilər ciddi problemləriniz - var, müalicə olunmalısız. Həkimlər hansı xəstəliyim olduğunu demədilər, amma müalicə yazdılar. Yaş öz sözünü deyir. Ayaqlarım sözümə baxmır. Artıq bir ildi, demək olar, yeriyə bilmirəm. Ancaq əsa
ilə gəzirəm. Ev şəraitində müalicə olunuram. Gəlinim mənə qulluq edir, oğlum qulluğumda durur. Düzü, həkimlər klinikada uzanmağımı təklif etdilər. Mən istəmədim. Evimdə mənə daha rahatdı. Mən xəstəxanada yata bilmərəm. Birdəki yaşım artıq az deyil. Fevralın 5-də, Allah qoysa, 88 yaşım olur. Həkimlər də yaşı soruşandan sonra başlıyırlar gülümsəməyə. Mən artıq yaşlandığımın fərqindəyəm. Ona görə də elə evimdə müalicə olunmaq istədim” söylədi. Xalq artisti bir ilə yaxındır ev şəraitində uzandığını, amma bu barədə heç bir məlumat vermədiyini də vurğuladı: "Xəstəliyim barədə də heç kimə açıqlama verməyi düşünməmişəm. Gəzə bilmirəm, yeriyə bilmirəm. Amma bu barədə deməmişəm. Sizin kimi insanların məni axtarması, telefonla da ola halımı soruşmağınız, inanın, mənim üçün böyük hədiyyədi. Mən bir insan, bir xanəndə kimi sevinirəm ki, məni yada salırsız. Sənətkara bundan gözəl diqqət, hədiyyə ola bilməz. Sizin kimi gənclərin məni axtarması məni ruhlandırır. Demək ki, mənim kimi sənətkarlar əbəs yerə illərini sənətə həsr etməyib. Məni yada saldığınız üçün sizə təşəkkür edirəm. Bu yaşda insana nə lazımdı? Sadəcə diqqət. Mən hər zaman xalqımdan razı olmuşam. İnşallah, ayağa qalxsam, yenə qulluğunuzdayam. İndi də tətildir deyə, dərsim də yoxdur. Həftədə iki dəfə dərsim olur. Onda da tələbələrim gəlib aparırlar. Mən xalq sevgisini hər zaman hiss etmişəm deyə şükr edirəm”.
Tahirə
