"Şəhid məzarının hasara alınması onun xatirəsinə hörmətsizlik olar. Buna yol verməməliyik”.
Bunu "Sherg.az”a Abşeron rayon sakinlərinin qəbiristanlıqda yerləşən şəhid məzarı ilə bağlı rəsmi qurumlara müraciət etməsinə münasibət bildirərkən döyüş tapşırıqlarını yerinə yetirən zaman sağ ayağını və sol gözünü itirən kəşfiyyatçı baş leytenant Kamil Musavi deyib.
O düşünür ki, ölkəmizdəki ermənipərəst qüvvələr şikayət edən sakinlər arasında dezinformasiya yayıb:
"Azərbaycanı sevməyən, şəhidi qəbul etməyən şəxslər digərlərinin də beyninə yeridib ki, şəhidin məzarı hasara alınsın. Niyə əhali başqa məzarlardan qorxmur, təşvişə düşmür, ancaq şəhid məzarını, şəhidin şəklini görəndə vahimələnir. Baxın, küçələrdə, bəzi binaların girişində, orta məktəblərdə, bəzi dayanacaqlarda şəhidlərin büstü yerləşdirilib, şəkilləri asılıb. Niyə indiyə qədər bütün bunlardan qorxan olmayıb, gənc şəhidin məzarını görmək istəmirlər? Belə şikayətlərin olması çox üzücüdür. İnsanlarımızı ayıq-sayıq olmağa, Azərbaycanı sevməyən qüvvələrdən uzaq olmağa, onları mənfi istiqamətə yönləndirənlərə layiqli cavab verməyə səsləyirəm.
Hər bir şəhidin şəkli bizim telefonlarımızda, övladlarımızın oxuduğu kitablarda, təhsil aldıqları məktəblərdə varsa, deməli şəhidlərimizin xatirəsi bizə əzizdir. Bizim üçün, bizim rahat yaşamağımız naminə canını fəda edən şəhiddən, o gəncdən necə qorxmaq olar axı ? Şəhidlərimizi unutmamalıyıq, onların məzarına kəm baxan, xatirəsinə hörmətsizlik edən şəxslərə qarşı mübarizə aparmalıyıq. Şəhidin məzarını alçaltmaq olmaz”.
Qeyd edək ki, Abşeron rayonunda qəbiristanlığın yaxınlığında yaşayan qonşular şəhid məzarı ilə bağlı rəsmi qurumlara müraciət ediblər. Belə ki, onlar məzarın evlərinin içindən göründüyünü və bundan narahatlıq keçirdiklərini bildirirlər. Qonşular başdaşı üzərindəki gənc əsgər Asim İsayevin şəklindən qorxduqlarını deyir və hündür hasara alınmasını istəyiblər. Şəhid Asim İsayevin bibisi Simuzər Əmiraslanova isə ötən il şəhid olan qardaşı oğlunun 2017-ci ilin avqust ayında burada dəfn olunduğunu söyləyib. O bildirib ki, 25 qonşu hər yerə şikayət edib, məzarın hasara alınmasını istəyib. Artıq daş, sement və qum da gətirib töküblər.
Aysel Aslan
