Bu qədər informasiyalara baxmayaraq Azərbaycanda insanlar tibbi maskalardan, nə üçünsə çox az istifadə edir
Fevral ayında «donuz qripi»nin yeni dalğası gözlənilir.
Bunu pediatr Vaqif Qarayev feysbuk səhifəsindəki paylaşımında yazıb.
Gürcüstanda «donuz qripi»nin getdikcə daha çox yayılmasına diqqət çəkən həkim prosesi lokallaşdırmağın mümkün olmadığını da yazıb:
«Gürcüstanda məktəblilərin tətili qriplə əlaqədar yanvarın 18-nə kimi uzadılıb. Aptek şəbəkəsinə kifayət qədər antivirus preparatı - Tamiflu verilib. Evdə müalicə alan xəstələr üçün reseptlə satılır.
Hələlik görünən odur ki, prosesi lokallaşdırmaq mümkün olmur.
Rəsmilərin verdiyi məlumata görə, fevral ayında virusun yeni dalğası gözlənilir. Belə!..»
Təhlükəli virusla bağlı «Şərq»ə danışan tibb üzrə fəlsəfə doktoru Şəmsiyyə Namazlı «donuz qripi» ilə bağlı profilaktik tədbirlərin vacib olduğunu dedi:
- Gürcüstanda «donuz qripi» artıq epidemiya halını almaqdadı. Gürcüstan da bizə yaxın ölkədir, sərhəd qonşumuzdur. Bu faktor bizim xüsusilə diqqətli olmağımızı tələb edir. Hər gün Gürcüstandan ölkəmizə gediş-gəliş həyata keçirilir, yüklər daşınır və sairə. Dezinfeksiya tədbirləri birbaşa sərhəddə aparılmalıdır. Mümkün olduğü qədər bu ölkəyə səfərlər, əgər təcili deyilsə, təxirə salınsın. Ölkəyə gətirilən yüklər diqqətlə yoxlamadan keçirilsin, dezinfeksiya olunsun. Əhaliyə isə məsləhətim budur ki, şəxsi gigiyena qaydalarına riayət etsinlər.
Əhali sıx toplaşma yerlərindən uzaq olsun. İctimai nəqliyyat vasitələri, metro vaqonları mütəmadi dezinfeksiya edilməlidir. Evdən kənar yerlərdə qidalanarkən ehtiyatlı olsunlar, tərkibində donuz əti ehtimalı ola biləcək qidalardan imtina etsinlər. Hazırda çoxsaylı restoranlar şəbəkəsi, kafelər fəaliyyət göstərir. Avropa mətbəxi adı altında vətəndaşlara tərkibi bilinməyən qidalar təqdim edilir. Hazırkı vəziyyətdə evdən kənar yerlərdə qidalanma təhlükəli ola bilər. İaşə obyektlərinə də nəzarət güclənməlidir.
İaşə obyektlərində, satış nöqtələrində, kafe-restoranlarda sanitar-gigiyenik normalara nə dərəcədə riayət edildiyi yoxlanmalıdır. Vətəndaşlar özləri də gərək təmizliyə riayət etsin. Əllər sabunla tez-tez yuyulmalıdır. Şəxsi gigiyenaya əməl edilməlidir. Bilirik ki, bu virus hava-damcı yoluyla keçir. Bu günlərdə əhaliyə əsas tövsiyəmiz tibbi maskalardan istifadə edilməsidir. Diqqət etsəniz görərsiniz ki, «donuz qripi» barədə bu qədər geniş informasiyaların yayılmasına, qonşu ölkədə hətta ölüm hallarının da yaşanmasına rəğmən bizdə insanlar tibbi maskalardan, nə üçünsə çox az istifadə edir. Halbuki, viruslardan qorunmağın ən yaxşı yolu, ilk növbədə tibbi maskalardan istifadə etməkdir. Bununla biz virusun kəskin formasından qoruna bilərik.
Vətəndaşlar halsızlıq, hərarət hiss etdikdə, dərhal həkimə müraciət etsinlər. Evdə oturub xəstəliklə özbaşına mübarizə aparmasınlar. Azərbaycan Səhiyyə Nazirliyi də «donuz qripi»nin mümkün təhlükəsi barədə əhaliyə xəbərdarlıq edib. Xəstəxanaların infeksiyon şöbələrində palatalar hazır vəziyyətdədir. Allah eləməmiş, əgər hər hansı ağırlaşma halı olarsa, dərhal xüsusi palatalara yerləşdiriləcəklər.
Məlahət Rzayeva
