"Orta məktəblərdə uşaqları məlumatlandırmaq lazımdır ki, zorla ərə verilərkən, evləndirilərkən və ya bu kimi hallarda onlar hara müraciət edə bilərlər”.
Bunu "Sherg.az”a son günlər mətbuatda və sosial şəbəkələrdə müzakirə olunan azyaşlı qızların zorla evləndirilməsi faktlarının qarşısının alınmasından danışarkən "Təmiz dünya” İctimai Birliyinin sədri Mehriban Zeynalova söyləyib.
Onun sözlərinə görə, hətta 5-ci sinifdən şagirdlərə hüquqlarının pozulduğu zamanlarda hansı "qaynar xətt”ə zəng edəcəkləri aşılanmalıdır:
"Belə məsələlərlə bağlı hüquq-mühafizə orqanlarına müraciət olunduqda, bu istiqamətdə araşdırılma aparılır. Belə hadisələrdə, orta məktəblərin, bələdiyyələrin, regionlarda fəaliyyət göstərən QHT-lərin fəaliyyətinin gücləndirilməsi vacibdir. Düzdür, hər bir problemin həllini, maarifləndirmə işlərini orta məktəblərin üzərinə qoymaq olmur. Çox zaman məktəblərin, müəllimlərin və pedaqoqların xəbəri olmadan bu cür faktlar qeydə alınır. Amma kiçik icmalar olan yerlərdə informasiya tez yayılır. Ona görə, orta məktəblərdə maarifləndirmə aparılması daha məqsədə uyğundur. Əsas məsələ isə, stereotiplərdən uzaq olmaq, qohumdur, qonşudur demədən, həmin azyaşlı uşaqları xilas etmək lazımdır”.
Qeyd edək ki, Lerik rayon sakini Mirtəmən Sadıqov boşandığı həyat yoldaşının 14 yaşlı qızını ərə verməsi ilə bağlı müraciət edib. O hüquq-mühafizə orqanlarından bu məsələyə münasibət bildirməsini istəyib: "Yetkinlik yaşına çatmayan qızımı anası ərə verir. Məsələnin həlli üçün dövlətdən kömək istəyirəm. Mən qızımın toyu haqda qohumlarımıza göndərilən dəvətnamədən xəbər tutmuşam”.
Aysel Aslan
