Ermənilərin törətdiyi genişmiqyaslı təxribat nəticəsində şəhid olan Vadim Qocayev və onun xəbərinə dözməyərək ürəyi partlayan atasının dəfn mərasimi keçirilib.
Oxu.Az-ın məlumatına görə, dəfn mərasimində şəhidin döyüş yoldaşları, Müdafiə Nazirliyi əməkdaşları, ictimaiyyət nümayəndələri iştirak edib.
Onların cənazəsi Qobustan Şəhidlər Xiyabanında birgə dəfn olunub.
10:07
Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində törədilən genişmiqyaslı təxribat nəticəsində şəhid olan Vadim Qocayevin və onun xəbərinə dözməyərək ürəyi partlayan atasının nəşləri ailəsinə təhvil verilib.
Oxu.Az-ın məlumatına görə, Vadim Qocayev və atası Alik Qocayevin nəşləri bu gün səhər saatlarında yaşadıqları Binəqədi rayonunda gətirilib.
Yaxınlarının məlumatına görə, A.Qocayev hər zaman bildirirmiş ki, Vadim əsgər getsə, o gələnə kimi ölərəm. A.Qocayev oğlunun nəşini təhvil almaq üçün Gəncəyə gedibmiş, ancaq orada vəfat edib.
Şəhidin bir yaşlı qızı var və həyat yoldaşı ikinci uşağa hamilədir.
Qeyd edək ki, sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib.
Müdafiə Nazirliyindən verilən məlumata görə, genişmiqyaslı təxribatın qarşısı alınarkən Azərbaycan Ordusundan 42, Dövlət Sərhəd Xidmətindən isə səkkiz hərbi qulluqçu olmaqla ümumilikdə Silahlı Qüvvələrin 50 hərbi qulluqçusu şəhid olub.
