Keyfiyyətsiz məhsulu kənd çolpası adı ilə camaata sırıyırlar
Aşağı qiymətə satılan kəsilmiş toyuqlar yumurtadan kəsilənlərdir
Son zamanlar binaların, metrostansiyaların qabağında 3-ü 10 manata kənd çolpası adı ilə
toyuqlar satılır. Ucuzluğuna həvəslənib, alanlar da az deyil.
Maraqlıdır, ətin bu qədər bahalaşdığı bir zamanda 3-ü 10 manata toyuq əti almaq olarmı?
Azərbaycan Quş Əti, Yumurta İstehsalçıları və İxracatçıları Assosiasiyasının (APEPEA) İdarə
Heyətinin sədri Mürvət Həsənli deyib ki, əslində bu cür toyuqlar ölkəmizə daha çox Belarusdan
gətirilir. Onun sözlərinə görə, bu toyuqlar dondurulmuş halda olurlar və qablaşdırmanın üzərində
2-ci sort olduğu qeyd edilir. Sadəcə, bəzi işbazlar qablaşdırmanı cırır, keyfiyyətsiz məhsulu kənd
çolpası adı ilə satmağa çalışırlar.
Qida məsələləri üzrə ekspert Ağa Salamov isə “Şərq”ə açıqlamasında deyib ki, toyuqların
ucuz olmasına əsas səbəb yaşı keçmiş olmalarıdır:
”Bu cür aşağı qiymətə satılan kəsilmiş toyuqlar yumurtadan kəsilənlərdir. Bu toyuqlar, yumurtalıq olaraq yetişdirilirlər. Yarka dövrünü keçən heyvan ətinin satışı və yeyilməsi isə doğru deyil. Yarka yumurtlamadan öncəki olan və xoruz olmamış dövrdür. Toyuq dediyimiz isə yumurtlayanlardır. Yumurtadan kəsilən toyuqları isə kəsib bu cür ucuz qiymətə satırlar. Belə həddi-buluğa çatan quş ətləri isə yeyilmək üçün əlverişli deyil”.
