Vacib məsələ mümkün qədər çox və irihəcmli su
anbarlarının tikilməsinə nail olmaqdır
“Bol sulu mövsümlərdə su həcmlərini anbarlarda
saxlamalıyıq ki, tələbatın maksimum vaxtlarında məişətdə və kənd təsərrüfatında
istifadə edə bilək”
“Azərbaycan
dünyada içməli sudan əziyyət çəkən ölkələrdən biridir. Bu problem ilbəil artır.
Biz suyun qiymətini saxlaya bilməyəcəyik". Bu sözləri deputat Rüfət Quliyev deyib. Onun sözlərinə
görə, şəhərdə gəzəndə avtomobil yuma yerlərində suyun şırhaşırla axıdıldığını
görürük: "100 faiz orada sayğac yoxdur. Suyu elə buraxırlar ki, elə bil şəlalədir.
Bir-iki aydan su qıtlığını hiss edəcəyik".
Qeyd edək
ki, havalar istiləndikcə suya olan tələbat artır, suyun verilməsində fasilələr
yaranır. Problemlər həlledilməz səviyyəyə çatdıqda içməli suyun satış qiymətində
yüksəlmələr qaçılmaz olur. Buna görə də suyun fasilələrlə verilmə prosesi artır
və qiymət artımı məsələsi gündəmə gəlir.
İqtisadçı-ekspert Eldəniz Əmirov isə hesab edir ki, içməli suyun qiymətinin
qalxması ilə iş bitmir. Azərbaycanın su təsərrüfatının və bu sistemdə idarəetmə
prinsiplərində dəyişikliyin olmayacağı təqdirdə yenidən su problemi qaçılmaz
olacaq: “Su çatışmazlığının əsas səbəbi şirin suyun qeyri-bərabər paylanılması,
qlobal istiləşmə, bu səbəbdən buxarlanma səviyyəsinin yuxarı olması, su mənbələrinin
çirklənməsi, su ehtiyatlarının zəif saxlanılması və s. hallardır ki, bunlara
qarşı mübarizə daha genişmiqyaslı olmalıdır.
Kənd təssərrüfatında
itkilərə ciddi fikir verilməlidir, nəinki vətəndaşı su kranını daha tez
bağlamağa təşviq etməyə. Çünki min vətəndaşın su kranını gec bağlaması bir
sahibkarın suyu boşuna axıtmasından daha az zərərlidir. Reallıq budur ki,
suvarma sistemlərindən istifadə edərkən hopma, kənarlara daşma kimi israf
halları daha çox baş verir. Digər vacib məsələ isə mümkün qədər çox və irihəcmli
su anbarlarının tikilməsinə nail olmaqdır. Bu su anbarları suya tələbatın pik həddə
çatdığı vaxtlarda istifadə edilə biləcək yeganə ümid yerimizdir. İl boyu, soyuq
havalarda bol sulu çaylarımız Xəzərə axır və şirin su statusunu itirir. Bol
sulu mövsümlərdə su həcmlərini anbarlarda saxlamalıyıq ki, tələbatın maksimum
vaxtlarında məişətdə və kənd təsərrüfatında istifadə edə bilək”.
Bakı və
Bakıətrafı ərazilərdə içməli su qıtlığı olmayacaq”. Bunu isə
"Trend"in sorğusuna cavab olaraq "Azərsu" Açıq Səhmdar Cəmiyyətinin
Mətbuat Xidmətinin rəhbəri Anar Cəbrayıllı deyib. O bildirib ki, içməli su
qıtlığının yaranmaması üçün "Azərsu" ASC kifayət qədər tədbirlər
görüb: "Yay aylarında əhalinin dayanıqlı su təminatının aparılması üçün
planlar hazırlanıb. Xətt siyirtmələrin, nasos stansiyalarının saz vəziyyətdə
olması, onların idarə edilməsi, rejimlərin tənzimlənməsini həyata keçirməklə
çalışacağıq ki, bütün abonentlərimizi dayanıqlı içməli su ilə təmin edək. Yəni əvvəlki
illərin yay aylarında təminat necə olubsa, bu il də Bakı və Bakıətrafı ərazilər
eyni qayda ilə içməli su ilə təmin ediləcək".
A.Cəbrayıllı
bildirib ki, əhalinin içməli su ilə təmin edilməsi üçün Kür çayı və Ceyranbatan
su anbarında kifayət qədər su ehtiyatı var: "Düzdür, su ehtiyatları əvvəlki
illərdəki kimi deyil, amma əhalinin içməli su təminatına bəs edəcək səviyyədədir".
