Azərbaycanda FETÖ-ya qarşı əməliyyat keçirilib, dörd nəfər həbs edilib.
“Report” “Yeni Şafak”a istinadən xəbər verir ki, əməliyyat nəticəsində FETÖ-nün Azərbaycandakı keçmiş rəhbərlərindən olan Döyrüş Cəfərov, təşkilatın maliyyə işlərinə cavabdeh olan Gümrah Əbdürəhmanov, “Yurd” adlanan mərkəzin direktoru Ruslan Əliyev və təşkilati işlərə cavabdeh olan Anar Əliyev saxlanılıb.
FETÖ üzvləri barəsində məhkəmə tərəfindən həbs qətimkan tədbiri həyata keçirilib.
Döyrüş Cəfərov, Gümrah Əbdürəhmanov və Anar Əliyevin FETÖ-nün Azərbaycandakı təhsil və təlim mərkəzlərində uzun müddətdir təşkilatın təbliğatı apardıqları və gənclərin təşkilata üzv olmasını istiqamətində addımlar atdıqları müəyyən edilib.
FETÖ-nün idarələrində, mətbəələrində, təlim mərkəzlərində, yataqxana mərkəzində və saxlanılan şəxslərin ünvanlarında aparılan axtarışlar zamanı qurumun maliyyə hesabatları, fəaliyyət planlarını əks etdirən sənədlər, FETÖ ideyalarını yayan radikal dini sənədlər, kompüterlər, elektron yaddaş cihazları, bank kartları, külli miqdarda saxta pul və odlu silahlar ələ keçirilib.
Başlanmış cinayət işi əsasında bildirilib ki, hərəkatın digər üzvlərinin də müəyyən edilərək tutulması istiqamətində istintaq və əməliyyat tədbirləri davam etdirilir.
Bu əməliyyatlarla Azərbaycanda möhkəmlənməyə çalışan FETÖ-yə böyük zərbə vurulub. Əldə edilən məlumata görə, FETÖ ilə yaxın əlaqələri olan siyasi partiya liderlərindən biri də həbs edilib.
FETÖ-nün təkcə Azərbaycanda yox bütün dünyada fəaliyyət göstərdiyini söyləyən təhlükəsizlik məsələləri üzrə ekspert Rəşad Rza "Sherg.az"a vurğulayıb ki, onlar uzun illərdir hazırlanmış bir təşkilatdır:
"Bu təkcə FETÖ adı altında yox, uzun müddətdir fəaliyyət göstərən bir sistemdir. Hətta zamanla adları dəyişə bilər. Bunun kökünü kəsmək üçün isə ilk növbədə Azərbaycanda agenturanı gücləndirmək lazımdır. Yəni öz milli agentlərimizi yetişdirməliyik. Həmçinin bu istiqamətdə daha da güclü sistem qurmalıyıq ki, ölkəyə FETÖ kimi təşkilatlar girə bilməsin. Düzdür aparılan əməliyyatlar nəticəsində müəyyən qədər təmizlənib, amma yenə də var və gizlin də olsa fəaliyyət göstərirlər. Ona görə də əməliyyatları yetərsiz hesab edirəm".
