Qeyd edək ki, bu ay ərzində Xırdalanda daha iki yeniyetmə qız özünü başqa binadan ataraq intihar edib. Onlardan birinin 16, digərinin 15 yaşı olub. Həmin şəxslər intihar etdikləri binada yaşamayıblar.
İntihar hadisələrinin getdikcə kütləviləşməsini "Sherg.az"a dəyərləndirən sosioloq Elçin Bayramlı bildirib ki, son vaxtlar sözügedən hadisələr sanki bir dəb halını alıb:
"Az qala hər gün eşitdiyimiz intiharların baş verməsinin həm sosial-iqtisadi, həm də mənəvi-psixoloji səbəbləri var. Əlbəttə ki, mənəvi-psixoloji səbəblərin payı daha çoxdur. Kiçik bir hissə isə sosial-iqtisadi amillərin təsiri ilə əlaqəlidir. Yəni sosial vəziyyətdən çətinlik çəkən, xəstəliyi olduğu halda müalicə ala bilməyən, evsiz, işsiz insanlar var ki, bezir və intihar edib, canını qurtarmağa çalışır. Lakin əksər adamlar mənəvi-psixoloji cəhətdən sağlam deyil. Son vaxtlar cəmiyyətdə mənəvi dəyərlər deqradasiyaya uğrayıb. Yad dəyərlərin inteqrasiyası baş verib. Cəmiyyət öz milli-mənəvi dəyərlərini qəbul etmir. Alt şüura təsir edən çox sayda KİV materialları izlənilir. İnsanın beyni adiləşir. Ona görə də dövlət elə siyasət yürütməlidir ki, sosial-iqtisadi səbəblərdən intihar halları baş verməsin. Bir ölkədə intihar faizi yüksəkdirsə, deməli, orada insan yaşayışı üçün normal şərait yoxdur. Bəzən boş-boş səbəblərdən də faciəvi hadisələr yaşanır. Bu siyahıda sevgisi boşa çıxan, namusu ləkələnən, zorakılığa məruz qalmış gənclər də var. Bu kimi hallara qarşı mübarizə aparılmalıdır. İnsanların sağlam psixologiyaya malik olması üçün müəyyən bir şərait yaradılmalıdır. Milli dəyərlərimizi qorumalıyıq. Hər şey son 20 ilə qədər normal idi. Əvvəllər nadir hallarda belə hallar baş verirdi. Azərbaycan dövləti, xalqı öz milli dəyərləri üzərində inkişaf etməlidir".
