Çexiyada yağan yağışların Polşa, Almaniya, Avstriya və Slovakiyada mənfi təbii fəsadlara səbəb olacağı gözlənilir.
Musavat.com xarici mediaya istinadla xəbər verir ki, meteoroloqların proqnozuna görə, bu həftə sonu Çexiyada yağan yağışlar qonşu Polşa, Almaniya, Avstriya və Slovakiyada zəncirvari reaksiyaya səbəb olacaq,
Bundan başqa, Bavariya dağlarında güclü qar yağacağı gözlənilir.
Bu səbəbdən Mərkəzi Avropa əyalətlərinin əhəmiyyətli bir hissəsi təcili olaraq növbəti həftə sonu mümkün daşqınlara hazırlaşır.
Polşa hakimiyyəti artıq ölkənin cənub bölgələrində - Aşağı Sileziya, Sileziya və Opolskie voyevodalığında pis hava şəraiti ilə bağlı yüksək səviyyəli xəbərdarlıq elan edib və Vroslav şəhərinin meri bu münasibətlə böhran komitəsi çağırıb.
"Cümə günündən bazar gününə kimi yerli daşqın təhlükəsi var", - Polşanın Meteorologiya Xidməti bildirib.
Çexiyada sinoptiklər Moraviya bölgəsinin şərq hissəsində leysan və küləyin sürətinin saatda 100 kilometrə çatacağı barədə xəbərdarlıq ediblər.
Bu nahiyədə yerləşən şəhərlər fəal şəkildə daşqına qarşı maneələr qurur və yaxınlaşan fəlakətlə mübarizə aparmaq üçün qum torbaları hazırlayır.
Çexiyanın ətraf mühit naziri Petr Hladik vəziyyəti ölkə əhalisinin 1997 və 2002-ci illərdə baş vermiş daşqınların onlarla insanın ölümünə və bir neçə milyard avro dəyərində ziyana səbəb olduğu vəziyyətlə müqayisə edib.
Çexiya hakimiyyəti artıq Çexiyadan Saksoniya federal torpağına axan Elbada suyun səviyyəsini məhdudlaşdıra və ya azalda bilməyəcəkləri barədə xəbərdarlıq edib.
Çexiya ilə həmsərhəd olan Avstriya və Slovakiyanın hakimiyyət orqanları həftəsonu üçün planlaşdırılan tədbirləri ləğv edib və fövqəladə hallar xidmətlərinə dəstək üçün hərbi personal göndərməyə hazırlaşır.
Avstriya kansleri Karl Nehammer iki gün əvvəl elan etdi ki, 1000-ə qədər əsgər hazır vəziyyətdədir.
Slovakiya hakimiyyəti də öz növbəsində 5-6 kilometr uzunluğunda mobil bəndlərin yerləşdirməyə hazır olduğunu, Slovakiya ordusu və könüllü yanğınsöndürmə briqadalarının da hazırlıq vəziyyətinə gətirildiyini bəyan edib.
Mövzu ilə bağlı fikirlərini bölüşən ekoloq Qorxmaz İbrahimli "Sherg.az"a bildirib ki, Avropa ölkələrində olan daşqının Azərbaycana heç bir təsiri ola bilməz:
“Lakin həmin ölkələrlə ticarət işi görürüksə, yəni daşqın ərazisində hər hansı müqavilə şərtləri varsa, və yerinə yetirilmirsə bizə zərər dəyə bilər. Digər tərəfdən bu gün bəzi ərazilərimizdə yağıntıların olacağı deyilib. Lakin inanmıram ki, bu daşqına çevrilsin. Ümumiyyətlə uzun müddətdir ölkəmizdə yağış yağmır. Əgər anidən yağış başlayarsa, bəzi ərazilərdə daşqına səbəb ola bilər. Lakin sentyabr ayından sonra daşqınlar gözləmək olmaz. Çünki daşqınlar əsasən iyun-iyul aylarında müşahidə edilir. Həmçinin Azərbaycanda noyabr ayında beynəlxalq tədbir keçiriləcək. Ümid edək ki, hava şəraiti tədbir zamanı yaxşı olacaq".
